काठमाडौं- वरिष्ठ साहित्यकार मदनमणि दीक्षितको ९७ वर्षकाे उमेरमा निधन भएको छ।
स्वास्थ्यमा समस्या देखिएपछि उनलाई केही दिनअघि ललितपुरको सुमेरु अस्पतालमा भर्ना गरिएको थियो। तर, स्वास्थ्यमा सुधार देखिएपछि दीक्षितलाई डिस्चार्ज गरी निवास कालिकास्थान ल्याइएकोमा उनी निवासमै बेहोस भएका थिए। सोपश्चात् उनलाई पुतलीसडकस्थित हिमाल अस्पतालमा लगिएको थियो।
हिमाल अस्पतालमै चिकित्सकले दीक्षितलाई मृत घोषणा गरेका हुन्। दीक्षितलाई मुटु, मिर्गाैला र श्वासप्रश्वाससम्बन्धी समस्या थियो।
विसं १९७९ फागुन ६ मा काठमाडौंको गौरीधारामा जन्मिएका दीक्षितले नेपालको साहित्य तथा पत्रकारितामा विशेष योगदान दिएका छन्। उनको ‘माधवी’ उपन्यास चर्चित मानिन्छ। माधवी उपन्यासकै लागि उनलाई २०३९ सालमा मदन पुरस्कारसमेत प्रदान गरिएको थियो। त्यही वर्ष यस उपन्यासले साझा पुरस्कारसमेत पाएको थियो।
माधवीबाहेक उनका चरैवेति (निबन्धसंग्रह), त्यो युग (निबन्धसंग्रह), हाम्रा ती दिन (निबन्धसंग्रह), म रुँदै बिर्सन्छु (संस्मरण), बर्लिन डायरीका पाना (यात्रावर्णन), लाखौं शिशुहरू लिफ्ट मागिरहेछन्, मेरी आमाको प्रश्नलाई आज जवाफ चाहिएको छ, कसले जित्यो कसले हार्यो? (कथासंग्रह), दशलाख हिरोसिमातिर, ग्यास च्याम्बरको मृत्यु (कथासंग्रह), जीवन महाअभियान, ऋग्वेद: केही प्रमुख सूक्त लगायतका ४६ कृति प्रकाशित छन्।
उनी लेखनाथ साहित्य पुरस्कार, देवीप्रसाद सापकोटा आमसञ्चार सम्मान, पद्मश्री सम्मान, राष्ट्रिय कलाश्री सम्मान आदिबाट सम्मानित भएका छन्।
दीक्षितका श्रीमती, तीन छोरा र एक छोरी छन्। दीक्षितको आजै पशुपति आर्यघाटमा अन्त्येष्टि गरिने पारिवारिक स्रोतले जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।