काठमाडौं– राष्ट्रियसभा निर्वाचनको उम्मेदवार छनोट गर्न दलहरु आन्तरिक छलफलमा जुटेका छन्। निर्वाचन कार्यतालिका अनुसार बुधबार उम्मेदवारको मनोनयनपत्र दर्ता गर्नुपर्ने भएकाले दलहरुले उम्मेदवार छनोटलाई अन्तिम रुप दिने तयारी गरेका हुन्।
राष्ट्रियसभा निर्वाचनमा समेत चुनावी तालमेल गर्ने निर्णय गरेका वाम गठबन्धन आबद्व दलहरु बाँडफाँट गरिएको सिटमा उम्मेदवार तय गर्न व्यस्त छन्। ५६ सिटका लागि हुने निर्वाचनमा वाम गठबन्धनले ४३ स्थानमा मात्र उम्मेदवार उठाउने निर्णय गरिसकेका छन्। त्यसमध्ये एमालेले २९ र माओवादी केन्द्रले १४ स्थानमा उम्मेद्वार खडा गर्नेछन्। वाम गठबन्धनले सातवटा प्रदेशमा उठाउने उम्मेदवारको क्लष्टर समेत वर्गिकरण गरेका छन्।
एमालेको सोमबार बसेको स्थायी कमिटी बैठकले प्रदेश नम्बर ५, ६ र ७ बाट उम्मेद्वार तय गरिसकेको छ। बाँकी प्रदेशका राष्ट्रियसभाका उम्मेदवार तय गर्न एमालेको स्थायी कमिटी बैठक पार्टी अध्यक्ष केपी ओलीको निवास भक्तपुरको बालकोटमा जारी छ।
बैठकले बाँकी प्रदेशका लागि राष्ट्रियसभाका उम्मेदवार तय गर्ने एमाले प्रचार विभाग प्रमुख योगेश भट्टराईले जानकारी दिए।
यस्तै, केन्द्रीय समिति बैठक स्थगित गरेर राष्ट्रियसभा उम्मेदवार छनोटमा जुटेको नेपाली कांग्रेस समेत आन्तरिक छलफलमा व्यस्त छ। सो पार्टीको छलफल प्रधानमन्त्री निवास बालुवाटारमा जारी छ। कांग्रेसको सोमबार बसेको बैठकले सात नम्बर प्रदेशबाट राष्ट्रिय सभाका उम्मेद्वारको छनोट गरेको थियो।
मधेश केन्द्रित दुई दल संघीय समाजवादी फोरम र राष्ट्रिय जनता पार्टी नेपाल समेत उम्मेद्वार छनोटमा व्यस्त छन्। दुई नम्बर प्रदेशबाट दुवै पार्टीले दुईदुई सिट जित्ने आन्तरिक विश्लेषण गरेका छन्।
राष्ट्रिय सभा निर्वाचनका लागि माघ २४ गते ५६ सिटका लागि निर्वाचन हुदैछ। निर्वाचनमा प्रत्येक प्रदेशबाट ८ जना राष्ट्रिय सभामा निर्वाचित हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
