काठमाडौं- नेपाल स्टक एक्सचेन्ज लिमिटेड र रसुवागढी हाइड्रोपावर कम्पनी तथा सान्जेन जलविद्युत कम्पनी लिमिटेडबीच सेयर सूचीकरण सम्झौता भएको छ।
यो सम्झौतासँगै रसुवागढी हाइड्रो पावर लिमिटेड र सान्जेन जलविद्युत कम्पनीले मंगलबारदेखि नै दोश्रो बजारमा सेयर कारोबार गर्ने बाटो खुलेको छ। दुवै कम्पनी र नेपाल स्टक एक्सचेन्जबीच सोमबार दोश्रो बजारमा सेयर सूचीकृत गर्ने सम्बन्धी सम्झौता भएको हो।
सेयर सूचीकरण सम्झौता पत्रमा स्टक एक्सचेन्जको तर्फबाट प्रमुख कार्यकारी अधिकृत चन्द्र सिंह साउदले र रसुवागढी हाइड्रोपावर कम्पनीको तर्फबाट कार्यकारी अधिकृत विश्व मल्ल तथा सान्जेन जलविद्युत कम्पनी लिमिटेडको तर्फबाट प्रमुख कार्यकारी अधिकृत किरण कुमार श्रेष्ठले हस्ताक्षर गरेका छन्।
सेयर निष्कासन तथा बाँडफाँट भएको झण्डै साढे ३ महिनापछि मात्रै यी दुई कम्पनीको सेयर पूँजी बजारमा सूचीकृत भएको हो। रसुवागढीले १ सय ११ मेगावाटको रसुवागढी र सान्जेनले ५७ दशमलब ३ मेगावाटको सान्जेन र माथिल्लो सान्जेन निर्माण गरिरहेको छ।
नेपाल स्टक एक्सचेन्ज र रसुवागढी हाइड्रोपावर कम्पनीबीच प्रतिसेयर अधिक तथा चुक्ता मूल्य १ सय रुपैयाँ कायम भएको ६ करोड १५ लाख ७८ हजार ९ सय कित्ता सेयर सूचीकरणको सम्झौता भएको छ। त्यसैगरी, सान्जेन जलविद्युत कम्पनीको ३ करोढ २८ लाख ५० हजार कित्ता सेयर सूचीकरण सम्झौता भएको छ।
रसुवागढीको सूचीकृत सेयरमध्ये सर्वसाधरणतर्फको १ करोड २ लाख ६३ हजार १ सय ५० र संस्थापक सेयरमा ३ करोड ४८ लाख ९४ हजार ७ सय १० कित्ता रहेको छ। कर्मचारी सञ्चयकोषमा रकम सञ्चित गर्ने सञ्चयकर्ता कर्मचारी, ऋणदाता संस्थाका कर्मचारी र संस्थापक संगठित संस्थाका कर्मचारीहरु समेत गरी १ करोड ६४ लाख २१ हजार ४० कित्ता सेयर पनि सूचीकृत भएको छ।
यो कम्पनीले आगामी असारभित्र निर्माण सम्पन्न गर्ने लक्ष्य लिएको छ।
त्यसैगरी, सान्जेनको सर्वसाधरणतर्फको ५४ लाख ७५ हजार कित्ता सेयर, कम्पनीलाई ऋण दिने संस्थाको ३ लाख ६५ हजार, संस्थापक सेयरधनी संस्थाका कर्मचारीको १२ लाख ७७ हजार ५ सय, सञ्चयकोषमा रकम सञ्चित गर्ने सञ्चयकर्ता कर्मचारीको ७१ लाख १७ हजार ५ सय कित्ता सेयर सूचिकृत भएको छ।
दुई कम्पनीको सेयर कारोबार सुरु भएसँगै दोश्रो बजारमा तरलता उत्पन्न भई लगानीकर्ताको मनोबल बढ्ने अपेक्षा नेप्सेले गरेको छ।
नेप्सेका अनुसार सान्जेनको सेयर कारोबार ९६ दशमलब ३१ देखि २ सय ८८ दशमलब ९६ रुपैयाँ र रसुवागढीको ९७ दशमलब २९ देखि २ सय ९१ दशमलब ८७ रुपैयाँको सीमाभित्र हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
