काठमाडौं– पक्राउ पर्ने डरले प्रदेशसभामा निर्वाचित गुन्डा नाइके दीपक मनाङे (राजीव गुरुङ) फरार भएका छन्। पक्राउ पर्ने डरले उनी आइतबार सपथ लिन गएनन्।
मनाङको प्रदेश ख बाट निर्वाचित भएका उनी तीनदिन यता भूमिगत छन्। गत बुधबार सर्वाेच्च अदालतले पुनरावेदन अदालतको उनलाई ५ वर्ष कैद गर्ने फैसला सदर गरेको भोलिपल्टै उनी फरार भएका हुन्।
प्रदेश ४ का प्रदेश सांसदहरुको आइतबार पोखरामा सपथ ग्रहणको कार्यक्रम थियो। प्रहरीले पक्राउ गर्ने सूचना पाएपछि मनाङे त्यहाँ गएनन्। स्रोतका अनुसार प्रहरी मुख्यालयले उनलाई पक्राउ गर्न कास्की प्रहरीलाई निर्देशन दिएको थियो। कास्कीका एसपी अशोक सिंहले भने, 'हामी मनाङेलाई पक्राउ गर्ने तयारीमा थियौं, तर उनी सपथ लिन आएनन्।'
आफूले प्रयोग गर्ने मोबाइल काठमाडौंमै छाडेर उनी भूमिगत भएको स्रोतक भनाइ छ।
गुन्डा नाइके मिलन चक्रे (मिलन गुरुङ) लाई २०६१ सालमा खुकुरी हानेको घटनामा उनलाई ५ वर्ष कैद सजाय सुनाइएको थियो। जसमध्ये २ वर्ष उनी जेल बसिसकेका छन् भने अब ३ वर्ष कैद भुक्तान हुन बाँकी छ।
पुनरावेदन अदालतले ०६९ सालमा मनाङेलाई दोषी ठहर गर्दै पाँच वर्ष कैद सजाय सुनाएको थियो भने ज्यान मुद्दाका अन्य चार अभियुक्त रेवत कार्की, रमेश सुनुवार, गणेश लामा र उमेश लामालाई भने सफाइ दिएको थियो।
पुनरावेदनले मनाङेबाहेकलाई सफाइ दिएपछि यस विरुद्ध सरकारले ०७० जेठ १० गते पुनरावेदन गरेको थियो।
अन्य प्रतिवादीको हकमा पुनरावेदन दर्ता भए पनि मनाङेले भने हालससम्म पुनरावेदन गरेका छैनन्। सर्वोच्चले पुनरावेदनको निर्णय सदर गर्ने फैसला सुनाएपछि उनी पुरानै आदेश अनुसार स्वत: दोषी ठहर भएका हुन्। मनाङेले पुनरावेदन गरेमा सफाइ पाउने वा ठहर हुने कानुनी बाटो बाँकी नै छ।
जिल्ला अदालत काठमाडौंले मनाङेलाई दोषी ठहर गर्दै दुई वर्ष जेल सजाय सुनाएको थियो। तत्कालीन समयमा उनले सो अवधिको सजाय काटिसकेका छन्। सर्वोच्चको फैसलापछि मनाङेले अब तीन वर्ष जेल सजाय भोग्नुपर्नेछ।
गैरकानुनी सम्पत्ति आर्जन गरी शुद्धीकरण गरेको अभियोगमा विशेष अदालतबाट सफाइ पाएका उनीमाथि सरकारले सर्वोच्च अदालतमा पुनरावेदन गर्ने भएको छ। अस्वाभाविक सम्पत्ति देखिएको तर विशेष अदालतले ठहर नगरेकाले उनीविरुद्ध पुनरावेदन गर्ने निर्णयमा सरकार पुगेको महान्यायाधीवक्ता कार्यालयका प्रवक्ता सञ्जीवराज रेग्मीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
