कैलाली- प्रदेश नम्बर ७ मा प्रदेशसभा सदस्यको सपथ ग्रहणमा ढिलाइ हुने भएको छ।
बिहान ११ बजे सपथ ग्रहण कार्यक्रम तय गरिए पनि प्रदेश प्रमुख मोहन मल्ल धनगढी आइनपुगेकाले दिउँसो २ बजेलाई कार्यक्रम सारिएको क्षेत्रीय प्रशासक लक्ष्मीप्रसाद पौडेलले जानकारी दिए।
खराब मौसमका हवाई उडान हुन नसकेपछि प्रदेश प्रमुख मल्ल सडकमार्ग हुँदै धनगढी आइरहेका छन्।
प्रदेश प्रमुख मल्ल धनगढी पुगेपछि सचिवालयमा उपस्थित हुनेछन्। सचिवालयमा पदबहाली गरेपछि मात्र सपथको कार्यक्रम सुरु हुनेछ। जिल्ला समन्वय समितिको सभाहलमा सपथ ग्रहणको कार्यक्रम राखिएको छ।
प्रदेश प्रमुखले प्रदेशसभाका ज्येष्ठ सदस्य नेपाली कांग्रेसकी समानुपातिक सांसद दिव्यश्वरी साहलाई सपथ ग्रहण गराउने र ज्येष्ठ सदस्यले अरु सदस्यहरूलाई सपथ ग्रहण गराउने कार्यक्रम तय गरिएको छ।
कार्यक्रममा राजनीतिक दलका नेताहरू, प्रतिनिधिसभा सदस्य लगायतलाई आमन्त्रण गरिएको छ।
प्रदेश नम्बर ७ मा प्रत्यक्षतर्फ ३२ र समानुपातिक तर्फ २१ जना गरेर कुल ५३ सदस्यीय प्रदेशसभा (संसद) रहेको छ। जसमा एमालेका २५, नेपाली कांग्रेसका १२, नेकपा माओवादी केन्द्रका १४ र राष्ट्रिय जनता पार्टीका दुई जना सदस्य निर्वाचित भएका छन्।
सपथ ग्रहण कार्यक्रम हुने र बैठक बस्ने जिल्ला समन्वय समिति कैलालीको सभाकक्ष र वरपर सुरक्षा व्यवस्था कडा बनाइएको छ। कैलालीका प्रमुख जिल्ला अधिकारी गोविन्दप्रसाद रिजालले सुरक्षा व्यवस्था मजबुत बनाइएको बताए।
सरकारले गत बुधबार प्रदेश प्रमुख र प्रदेशका अस्थायी मुकाम तोकेपछि प्रदेशसभा गठनको औपचारिक प्रक्रिया अघि बढेको हो। शुक्रबार राष्ट्रपतिले सबै ७ प्रदेशका प्रमुखहरूलाई सपथ ग्रहण गराएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
