इटहरी– रानी-विराटनगर-इटहरी-धरान ४९ किलोमिटर सडक आयोजना अन्तर्गत इटहरी-धरान ६ लेन सडकण्ड निमार्णको काम सम्पन्न हुन नपाई भत्किएको छ। केही समयअघि मात्र कालोपत्रे गरिएको सडकका बीचमा खाल्डा देखिन थालेको हो। हाल सडक विस्तारको काम मौसमको कारण स्थगित गरिएको आयोजनाको कार्यालयले जानकारी दिएको छ।
उक्त सडक विस्तारको लागि आशिस सन्तोषी लुम्बिनी जेभीलेले ठेक्का पाएको छ। तरहरादेखि इटहरीसम्मको ३ किलोमिटर सडक निर्माणको जिम्मा पाएको उक्त कम्पनीले निर्माण गरेको सडकका धेरै स्थानमा यस्तो समस्या देखिएको छ। सडकमा खाल्डा पर्न थालेपछि सिमेन्ट र बालुवाले टाल्ने काम सुरु गरिएको छ। २०७४ कार्तिकदेखि यो सडकखण्डमा काम सुरु भएको थियो।
निर्माण कम्पनीका सञ्चालक राजेश बोहोराका अनुसार सडक भत्केको नभई टेस्टका लागि केही स्थानमा प्वाल पारिएको हो। उनले भनेजस्तै सडक टेस्टको लागि प्वाल परिएको भन्दापनि ठूलाठूला खाल्डा परेको कारण सडकको स्तरोन्नति नै कमसल गुणस्तरमा भएको देखिन्छ। उता अयोजनाका प्रमुख बद्रीप्रसाद शर्मा पनि निर्माण भएपछि टेस्ट गर्न सानो प्वाल पारिएको हुन सक्ने बताउँछन्। केही दिनपछि आफूहरू अनुगमनमा जाने र त्यसपछि मात्र यसको सत्यता बुझ्न सकिने उनको भनाइ छ। सडक नै भत्किएको भए निर्माण कम्पनीको कमजोरी भएको उनको भनाइ छ।
.jpg)
हाल रानी-विराटनगर-इटहरी-धरान सडक आयोजना अन्तर्गत पर्ने इटहरी-तरहरा खण्डबाहेक अन्य स्थानका काम भन् काम धमाधम भइरहेको छ। तर इटहरी, धरान र दुहबी बजारक्षेत्रमा भने अझै काम सुरु हुन सकेको छैन। सडक आसपासका घर भत्काउने विषयमा स्थानीयसँग कुरा नमिलेपछि काममा अवरोध आएको प्रमुख शर्मा बताउँछन्। त्यस्तै तरहरादेखि धरानसम्मको १५ किलोमिटर सडकमा १५ सयभन्दा बढी रुख काट्नुपर्ने भएकोले वन विभागसँग समन्वय भइरहेको उनले बताए।
अहिले ३४ किलोमिटर सडकका लागि १४ चरणमा ठेक्का लागेर काम भइरहेको प्रमुख शर्माको भनाइ छ। त्यसमध्ये पनि १२ किलोमिटर सडक कालोपत्रे भइसकेको र बाँकी काम एक वर्षभित्र सक्ने गरी तयारी गरिएको उनले बताए।
इटहरी-तरहरा सडकखण्डका स्थानीय टंक दाहालका अनुसार सो सडक बन्न नपाई भत्किएको हो। कमजोर गुणस्तरका सामग्री प्रयोग गरिएकाले भत्किएको उनको दाबी छ। अहिले निर्माण कम्पनीले सडक टालटुल गर्न थालेको उनले बताए। केही दिन अघि ठेकेदारहरुसँग आफैंले किन यस्तो गरेको भनी प्रश्न गर्दा आफूहरूको काममा अरुले चासो दिन जरुरी नभएको प्रतिक्रिया दिएको दाबी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
