काठमाडौं- नेपाल राष्ट्र बैंकका पूर्व कार्यकारी निर्देशक नरबहादुर थापाले मौद्रिक नीतिले उद्योगी व्यवसायीलाई भन्दा बैंक तथा वित्तीय क्षेत्रलाई बढी प्राथमिकतामा राखेको बताएका छन्। चालू आवको मौद्रिक नीतिका विषयमा भएको छलफलमा उनले बैंकिङ क्षेत्र र व्यापारीलाई सन्तुलितरुपमा समेट्न नसकेको आरोप लगाए।
थापाले मौद्रिक नीतिले बैंकरका कुरा बढी सुनेको जस्तो देखिएको पनि उल्लेख गरे। 'मौद्रिक नीतिले निजी क्षेत्रलाई हेरेन, बैंकलाई मात्रै हेर्यो कि जस्तो देखियो,' उनले भने, 'अर्को कुरा दीर्घकालीन ब्याजदर नहुँदा पनि मौद्रिक नीति हात्ती आयो हात्ती आयो भनेझैँ भएको छ।'
उद्योगी व्यवसायीहरुले मौद्रिक नीतिले कर्जामा लिइने ब्याजदर एकल अंकमा ल्याउन पहल गरेको भए पनि त्यो पूरा हुन नसकेकोसमेत उनले टिप्पणी गरे। ब्याजदर एकल अंकमा झार्न सके साना व्यवसायी कम मर्कामा पर्ने उनको भनाइ छ।
विगतमा विनिमय सञ्चिति घाटा भएको अवस्थामा कडा खालको मौद्रिक नीति आउने गरेकोमा चालू वर्षको मौद्रिक नीति नरम खालको नै रहेको उनले टिप्पणी गरे। बैंक तथा वित्तीय संस्थाले प्रवाह गरेको कूल कर्जाको १० प्रतिशत कृषिमा र १५ प्रतिशत ऊर्जा तथा पर्यटन क्षेत्रमा लगानी गर्नुपर्ने व्यवस्था भए पनि त्यो लागू हुन नसकेको थापाको भनाइ छ।
नेपाल राष्ट्र बैंकले पुनर्कर्जा कोष बढाएर १ खर्ब रुपैयाँ बनाउनु पर्ने उनको माग छ। ‘अहिले पुनर्कर्जा कोष ५० अर्ब बराबरको छ, त्यसमा पनि बजारमा परिचालित रकम २२ अर्ब बराबर मात्रै छ,' उनले भने, 'कोषलाई १ खर्ब बनाउन सके निजी क्षेत्रलाई व्यवसाय गर्ने वातावरण सहज हुन्छ।' (फाइल तस्बिर)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।