भैरहवा- राष्ट्रिय गौरवको आयोजनाको रूपमा रहेको बेलहिया-बुटवल ६ लेन व्यापारिक मार्ग विस्तारको काममा अदालतले दिएको अन्तरिम आदेशका कारण काम प्रभावित भएको छ। करिब ८० प्रतिशत काम सम्पन्न भइसकेको आयोजनाको बाँकी काम भने उच्च अदालत तुलसीपुरको बुटवल इजलासले गर्ने फैसला नआउँदा ढिलाइ भएको हो।
सडक विस्तार आयोजनामा आफूहरुको जग्गा प्रयोग हुने भन्दै ३९ जना स्थानीय घरधनीले सडक विस्तार कार्य रोक्न माग गर्दै उच्चको बुटबल इजलासमा रिट निवेदन दर्ता गराएका थिए। अदालतले घरधनीको पक्षमा अन्तरिम आदेश जारी गर्दा बुटवलको सडक विस्तार कार्य प्रभावित बन्न पुगेको हो। उनीहरुको मुद्दाका कारण करिब ३ किलोमिटर सडकखण्ड विस्तारको काम ठप्पप्राय हुन पुगेको हो।
बुटवलका सडक छेउका घरधनीहरू नारायणीदेवी प्रधान, चोपनारायण श्रेष्ठ, सायरा खातुन, महेश्वर प्रसाद श्रेष्ठ, लालकुमारी श्रेष्ठ, किशोर विश्वकर्मा, जयकुमारी पौडेल, अमृत काफ्लेलगायतका ३९ जना घरधनीहरुले आन्तरिम आदेश माग गरेका छन्।
सडक मिचेर घर बनाएको आरोप लागेका उनीहरुको अवरोधका कारण सडक विस्तार कार्य अवरुद्ध हुँदै आएको छ। सो मुद्दा विचारधीन छ। अदालतमा रिटको सुनुवाई ढिलो हुँदा आयोजनाका काम प्रभावित भएको हो।
बाँकी २४ किलोमिटरको सडकको निर्माणमध्ये २३ किलोमिटर मुख्य सडकको निर्माण कार्य सकिएको आयोजनाले जनाएको छ। त्यस्तै मुख्य सडकको दायाँबायाँ सर्भिस सडक पनि १६ किलोमिटरमा निर्माण सम्पन्न भइसकेको आयोजनाका प्रमुख जीवेन्द्र मिश्रले बताए। उनका अनुसार २४ किलोमिटरमध्ये १४ किलोमिटरमा फुटपाथ समेत बनिसकेको छ।
सडकको ‘ग्रिन जोन’मा हरियाली प्रवर्द्धन गर्ने काम भइरहेको छ। यसको पनि ९ किलोमिटरसम्म बिरुवा रोपिसकिएको र अन्य स्थानमा काम भइरहेको छ।
‘सडकमा हुने सबै काम समानन्तरको रुपमा अगाडी बढिररहेका छन्,’आयोजना प्रमुख मिश्रले नेपाल लाइभसँग भने, ‘अगामी चैत महिनासम्म २४ किलोमिटरसम्मको सडक तयार भएर पूरै चिटिक्क देखिन्छ।’
उनले साढे ३ किलोमिटरसम्म सडक निर्माणको लागि अदालतको फैसला आएलगत्तै काम सुचारु हुने बताए। बुटवलको चौराहदेखि गोलपार्कसम्मको साढे तीन किलोमिटरसम्म सडक निर्माण नभएपनि आयोजनाले अन्य काम भने जारी राखेको छ।
विद्युत प्राधिकरण र खानेपानी कार्यालयले आयोजनासँग आवश्यक समन्वय नगरिदिँदा विद्युतको पोल सार्नेदेखि लिएर खानेपानीको पाइप बिछ्याएर घरमा सप्लाई गर्नेसम्मका काम आयोजना आफैंले गरिरहेको छ।
‘साढे ३ किलोमिटरसम्मका सडकका विद्युत पोल सार्दै खानेपानीको पाइप बिछ्याइसकेका छौँ,’उनले भने, ‘अब घरघरमा कनेक्सन गर्न मात्र बाँकी छ।’ बेलहियादेखि बुटवलसम्म सडक निर्माणका लागि खण्डखण्डमा वर्षै पिच्छे ठेक्का लगाएर कामको सुरुवात गर्दा आयोजना सम्पन्न हुनमा ढिलाइ भएको आयोजना प्रमुख मिश्रले जानकारी दिए।
विभिन्न समस्या झेल्दै आएको आयोजनाले ८ वर्षको अवधिमा ८२ प्रतिशत काम सम्पन्न गरेको दाबी गरेको छ। नेपाल-भारत सीमा नाका भैरहवाको बेलहियादेखि बुटवलको गोलपार्कसम्मको साढे २७ किलोमिटर सडक निर्माणको काम भइरहेको छ।
सुरुमा खण्डखण्ड गरी ठेक्का लगाइएको थियो। बेलहियादेखि बुटवलको राजमार्ग चौराहासम्म २४ किलोमिटरको सुरुमा काम भएको थियो। त्यसपछि राजमार्ग चौराहादेखि गोलपार्कसम्म साढे ३ किलोमिटरको ठेक्का लगाएर काम सुरु गरिएको थियो। तर अहिले स्थानीयको विवादका कारण बुटवलको राजमार्ग चौराहदेखि गोलपार्कसम्मको सडक विस्तारको काम प्रभावित भएको छ।
आयोजनाले पटकपटक सूचना जारी गरी सडक क्षेत्रका घर तथा संरचना भत्काउन भने पनि स्थानीयले अवरोध गरेकाले काम प्रभावित बनेको हो।
सम्बन्धित समाचार:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
