काठमाडौं- आर्थिक वर्ष २०७५/७६ को अन्तसम्ममा नेपाल विद्युत प्राधिकरणले ६ हजार ४२ मेगावाट विद्युत उत्पादन क्षमता रहेका ३ सय ४० वटा आयोजनासँग विद्युत खरिद-बिक्री सम्झौता (पिपिए) गरेको छ।
प्राधिकरणको तथ्याङ्कअनुसार कूल जडित क्षमता ६ हजार मेगावाटभन्दा बढी हुनेगरी निजी क्षेत्रका विद्युत प्रवर्द्धक कम्पनीहरू र नेपाल विद्युत प्राधिकरण बीच विद्युत खरिद-बिक्री सम्झौता सम्पन्न भएको हो।
प्राधिकरणले अघिल्लो आर्थिक वर्षमा मात्रै १ हजार ९ सय मेगावाट जडित क्षमता भएका ४ दर्जनभन्दा बढी विद्युत आयोजनासँग पिपिए गरेको छ।
२०५२ माघ १ गते हिमाल हाइड्रो लिमिटेडले गोरखा जिल्लामा बनाएको ६० मेगावाट उत्पादन क्षमता रहेको खिम्तीखोला जलविद्युत आयोजनासँग पहिलोपटक पिपिए सम्झौता गरेको थियो। त्यसपछि हालसम्ममा पिपिए सम्झौता भएका ८३ वटा आयोजना सञ्चालनमा आइसकेका छन्। जसको कूल जडित क्षमता ५ सय ६० मेगावाट बराबर रहेको छ।
गत आर्थिक वर्षको अन्तसम्मा पिपिए र वित्तीय व्यवस्था (फाइनान्सियल क्लोजर) दुवै भइसकेका आयोजनाको संख्या १ सय २२ वटा छन्। जसबाट २ हजार ५ सय ८७ मेगावाट विद्युत उत्पादन हुने लक्ष्य राखिएको छ।
त्यसैगरी, वित्तीय व्यवस्था हुन नसकेका २ हजार ८ सय ९५ मेगावाट उत्पादन क्षमता रहेका १ सय ४६ वटा आयोजना निर्माणको विभिन्न चरणमा रहेका छन्।
आर्थिक वर्ष २०७४/७५ को अन्त्यसम्ममा निजी क्षेत्रका विद्युत प्रवर्द्धक कम्पनीहरू र प्राधिकरणबीच कूल जडित क्षमता ४ हजार १ सय ३८ मेगावाट बराबरका २ सय ४४ वटा आयोजनाहरूको विद्युत खरिद-बिक्री सम्झौता सम्पन्न भएको थियो। जसमध्ये कूल जडित क्षमता ५ सय ११ मेगावाटका ७३ वटा आयोजनाहरूबाट व्यापारिक उत्पादन सुरु भई राष्ट्रिय विद्युत प्रशारण प्रणालीमा ल्याइएको थियो।
गत आर्थिक वर्षमा ४८ मेगावाट उत्पादन क्षमता बराबरका ९ वटा आयोजना राष्ट्रिय प्रशारण लाइनमा जोडिएका छन्। गत आवबाट व्यवसायिक उत्पादन सुरु गरेको २२ मेगावाट क्षमताको बागमती साना जलविद्युत आयोजना सबैभन्दा ठूलो आयोजना हो।
गत आर्थिक वर्षमा दूईवटा आयोजनाको मात्रै पिपिए सम्झौता रद्द भएको प्राधिकरणले जनाएको छ।
रोल्पा जिल्लामा बन्ने भनिएको ९ सय ५५ किलोवाटको धान्सीखोला जलविद्युत आयोजना र गोरखा जिल्लाको लुदी खोलामा बन्ने भनिएको ७ सय ५० किलोवाट क्षमताको अर्को आयोजनाको पिपिए सम्झौता रद्द गरिएको प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
