काठमाडौं- मुख्य भन्सार नाका वीरगन्जबाट हुने वैदेशिक व्यापार बढेको छ। आर्थिक वर्ष २०७४/०७५ को तुलनामा आर्थिक वर्ष २०७५/०७६ मा वीरगन्जबाट हुने आयात तथा निर्यात दुवै बढेको छ।
भन्सार कार्यालय वीरगन्जका अनुसार गत आर्थिक वर्षमा यस नाकाबाट ५ खर्ब ८३ अर्ब ७८ करोड रुपैयाँ बराबरको सामान आयात भएको छ। अघिल्लो आर्थिक वर्षमा यो नाकाबाट ५ खर्ब १६ अर्ब ८२ करोड रुपैयाँ बराबरको वस्तु आयात भएको थियो।
एक आर्थिक वर्षमा यो नाकाबाट भएको आयात १२.९६ प्रतिशतले बढेको भन्सार कार्यालयको तथ्यांकमा उल्लेख छ। यो नाकाबाट पेट्रोलियम पदार्थ, सवारी साधन र औद्योगिक कच्चा पदार्थ धेरै आयात हुन्छ।
गत आर्थिक वर्षको असार मसान्तमा वीरगन्जबाट ४५ अर्ब ९१ करोड रुपैयाँको सामान आयात भएको थियो। मासिक तुलनात्मक विवरण हेर्दा गत आर्थिक वर्षको अन्तिम महिनामा भने अघिल्लो वर्ष ५० अर्ब ५२ करोड रुपैयाँको सामान एक महिनामा आयात भएको थियो।
यसैगरी, यो नाकाबाट गत आर्थिक वर्षमा २५ अर्ब १८ करोडको सामान निर्यात भएको तथ्यांकमा उल्लेख छ। त्यसअघिको आर्थिक वर्षमा वीरगन्जबाट १४ अर्ब ५९ करोड रुपैयाँको निर्यात भएको थियो।
मासिक तुलना गर्दा गत आर्थिक वर्षको असारमा २ अर्ब ४४ करोड रुपैयाँको सामान निर्यात भएको थियो। अघिल्लो आर्थिक वर्षको अन्तिम महिनामा १ अर्ब ४१ करोड रुपैयाँ बराबरको सामान निर्यात भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
