बुटवल/डडेल्धुरा- प्रदेश ५ सरकारले आर्थिक वर्ष २०७५/७६ मा लक्ष्य अनुसार विकास बजेट खर्च नसकेको पाइएको छ। गत आर्थिक वर्षमा प्रदेश सरकारले विनियोजन गरेको कुल बजेटको ३७ प्रतिशत बजेट फिर्ता गएको प्रदेश लेखा नियन्त्रण कार्यालय बुटवलले जनाएको छ।
प्रदेश लेखा नियन्त्रण कार्यालय बुटवलका अनुसार गत आर्थिक वर्षका लागि प्रदेश सरकारले विनियोजन गरेको कुल बजेट २७ अर्ब १६ करोड १७ लाखमध्ये १७ अर्ब १४ करोड ८४ लाख रुपैयाँ भएको प्रदेश लेखा नियन्त्रण कार्यालय बुटवलका प्रमुख लेखा नियन्त्रक दीपक ज्ञवालीले जानकारी दिए।
प्रदेश लेखा नियन्त्रण कार्यालयले प्रस्तुत गरेको तथ्यांक अनुसार सरकारले चालुतर्फ ६ अर्ब ८७ करोड ७१ लाख रुपैयाँ खर्च गरेको छ भने पुँजीगततर्फ १० अर्ब २७ करोड १३ लाख खर्च गरेको छ। गत आर्थिक वर्षमा सरकारले चालुतर्फ ९ अर्ब ८२ करोड ६८ लाख र पुँजीगततर्फ १७ अर्ब ३३ करोड ४९ लाख रुपैयाँ विनियोजन गरेको थियो। जसमा चालुतर्फ ७० प्रतिशत, पुँजीगततर्फ ५९ प्रतिशत तथा कुल बजेटको ६३ प्रतिशत वित्तीय प्रगति भएको प्रमुख प्रदेश लेखा नियन्त्रक ज्ञवालीले बताए।
उनले प्रदेश सरकारले स्थानीय तहलाई उपलब्ध गराएको अनुदान चालु खर्चका रुपमा लिइएको र समानीकरण बाहेक अन्य अनुदानको खर्च नभए बाँकी रहेको रकम फिर्ता हुने सम्भावना रहेकाले यो तथ्यांकमा केही घटबढ हुन सक्ने उल्लेख गरे।
डडेल्धुरामा डेढ अर्ब फ्रिज
डडेल्धुरा जिल्लामार्फत सञ्चालित अधिकांश योजनाहरुको बजेट फ्रिज भएको छ।
आर्थिक वर्ष २०७५/७६ मा सञ्चालन भएका योनाजनाहरुको डेढ अर्ब बजेट फ्रिज भएको कोष तथा लेखा नियन्त्रण कार्यालय डडेल्धुराले जनाएको छ। डडेल्धुरा जिल्लामा संघ र प्रदेशबाट प्राप्त बजेट चालु तथा पुँजीगत बजेट मार्फत सञ्चालन गरिएका अधिकांश योजनाहरुको बजेट फ्रिज गएको हो।
सबैभन्दा बढी खानेपानी र सडकतर्फ फ्रिज गएको कोष तथा लेखा नियन्त्रण कार्याल डडेल्धुराका निमित्त लेखा नियन्त्रक चन्द्रदेव जोशीले जानकारी दिए।
संघ अन्तर्गत चालुतर्फ प्राप्त बजेट ३ अर्ब ३१ करोड ९० लाख १९ हजार ९ सय ५१ मध्ये १५ करोड १३ लाख ९८ हजार ९ सय ४४ रुपैयाँ फ्रिज भएको छ। यस्तै पुँजीगततर्फ ७७ करोड २ लाख ७० हजार प्राप्त बजेटमध्ये पुँजीगततर्फ ६ करोड ३२ लाख फ्रिज भएको छ।
प्रदेशबाट प्राप्त बजेट चालुतर्फ ५० करोड ४१ लाख ६४ हजार २७५ रुपैयाँ थियो। जसमा ९ कारोड २८ लाख ४९९ रुपैयाँ फ्रिज भएको छ। पुँजीगततर्फ १ अर्ब ८२ करोड ६३ लाख ४६ हजार ४ रुपैयाँ प्राप्त बजेट मध्ये ८३ करोड ८८ लाख ३० हजार ४४५ रुपैयाँ फ्रिज गएको जोशीले बताए।
यसैगरी खानेपानी डिभिजन कार्यालय डडेल्धुराको २० करोड ३२ लाख रकममध्ये १९ करोड १० लाख र रुपैयाँ खर्च भएको छ भने १ करोड २३ लाख रुपैयाँ फ्रिज भएको छ।
बजेटको अख्तियारी बेलैमा नआउँदा खर्च गर्न नसकिएको अधिकांश कार्यालय प्रमुखहरु बताउँछन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।