काठमाडौं- ढुवानी सेवामा भ्याट लगाउने व्यवस्था रोक्न उद्योगी/व्यवसायीहरुले दबाब दिएपछि सो सम्बन्धमा अध्ययन गर्न अर्थ मन्त्रालयले कार्यदल गठन गरेको छ। सरकारले आर्थिक विधेयक-२०७६ मार्फत् मूल्य अभिवृद्धि कर ऐन, २०५२ को अनुसुची-१ मा संशोधन गर्दै ढुवानी सेवामा मूल्य अभिवृद्धि कर लाग्ने व्यवस्था गरेको भन्दै व्यवसायीहरुले आपत्ति जनाएपछि अध्ययन कार्यदल गठन भएको हो।
मन्त्रालयका प्रवक्ता उत्तरकुमार खत्रीका अनुसार उक्त विषयको कार्यान्वयनका सम्बन्धमा व्यवसायी मागका सम्बन्धमा थप अध्ययन गर्न समिति गठन भएको हो। उक्त समितिले अभिवृद्धि कर ऐन २०५२ को संशोधित व्यवस्था कार्यान्वयन गर्ने सम्बन्धमा अध्ययन गरी ढुवानी सेवाको अभिवृद्धि कर सम्बन्धी कार्यविधि तर्जुमा गर्न सहयोग गर्नेछ।
आन्तरिक राजश्व विभागका उप-महानिर्देशक (नीति शाखा) को संयोजकत्वमा अर्थ मन्त्रालय, आन्तरिक राजश्व विभाग, नेपाल ट्रक व्यवसायी महासंघ र ढुवानी व्यवसायी महासंघ नेपालका प्रतिनिधि रहने गरी उक्त कार्यदल गठन भएको प्रवक्ता खत्रीले जानकारी दिए।
ढुवानी सेवामा मुल्य अभिवृद्धि कर लागु गर्ने नयाँ व्यवस्थालाई उद्योगी व्यवसायीहरुका छाता संगठन तथा ढुवानी व्यवसायीहरुका छाता संगठनले समेत विरोध जनाउँदै आएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।