चरिकोट- तामाकोसी पाँचौं जलविद्युत आयोजनाका लागि अधिग्रहण गर्न लागिएको जग्गाको मूल्य निर्धारणप्रति स्थानीयवासीले असन्तुष्टि व्यक्त गरेका छन्।
आयोजनाका लागि आवश्यक जग्गाको प्रमुख जिल्ला अधिकारी संयोजक रहेको जिल्लास्तरीय दर निर्धारण समितिले दुई महिनाअघि गरेको मूल्य निर्धारण कम भएको भन्दै उनीहरुले असन्तुष्टि जाहेर गरेका हुन्।
जग्गाधनीले प्रमुख जिल्ला अधिकारी र आयोजना पक्षलाई बुधबार भेट गरी जग्गाको पुनः मूल्यनिर्धारणका लागि आग्रह गरेका छन्।
स्थानीय जग्गाधनी शान्तबहादुर केसीले सबै जग्गाको एउटै मूल्याङ्कन हुनुपर्ने बताए। सबै जग्गा उस्तै भएकाले जिल्लाको मूल्य निर्धारणमा विभेद गर्न नहुने आफूहरुको माग रहेको उनको भनाइ थियो।
आयोजनाका लागि आवश्यक जग्गाका लागि सार्वजनिक सूचना प्रकाशित भइए जग्गा अधिग्रहणका लागि मूल्य निर्धारण समेत भइसकेको छ। दुई महिनाअघि दोलखाका प्रमुख जिल्ला अधिकारी लक्ष्मणविक्रम थापाको अध्यक्षतामा बसेको बैठकले न्यूनतम रु ३ लाख ७४ हजारदेखि अधिकतम ७ लाख ४८ हजार प्रतिरोपनी मूल्य निर्धारण गरेको थियो।
आयोजनाका लागि विगु गाउँपालिका–४ साविक लादुक–९ को सुरीटारमा रहेको जग्गा अधिग्रहण गरिने भएको छ। मूल्य निर्धारण समितिले सिंगटी–भोर्ले–तामाकोसी सडकले छोएको सडकको २५ मिटर पछाडिसम्मको मूल्य प्रतिरोपनी रु सात लाख ४८ हजार निर्धारण गरेको छ। त्यस्तै, सडकले नछोएको बाँकी जग्गाको मूल्य रु ३ लाख ७४ हजार निर्धारण गरेको छ।
आयोजनाका लागि ५८ जनाको ५५ रोपनी जग्गा आवश्यक पर्छ। तामाकोसी पाँचौंको सुरीटारमा विद्युत् गृह लगायतका संरचना तयार गर्ने योजना छ। आयोजनाको विद्युत् गृह भूमिगत हुनेछ।
आयोजनाको विस्तृत आयोजना प्रतिवेदन (डिपिआर) को तयारी जर्मन कम्पनी ल्याह्मेरले गरिरहेको छ। ल्याह्मेरले ६ महिनाभित्र डिपिआर तयार गरिसक्नुपर्ने बताइएको छ।
प्रमुख जिल्ला अधिकारी थापाले जिल्लाबाट भएको निर्णय यहीँबाट पुनःमूल्यांकन हुन नसक्ने बताए। 'स्थानीय चलनचल्तीको मूल्यांकन, सरकारी मूल्यांकन समेतलाई आधार मानेर मुख्य सडक, नदी किनार समेतलाई हेरेर मूल्य निर्धारण गरेका हौँ,' उनले भने।
विगू गाउँपालिकाका उपाध्यक्ष सञ्जीव ओलीले जग्गाको मुआब्जा निर्धारण स्थानीय चलनचल्तीभन्दा न्यून भएको भन्दै यसको पुनः मूल्याङ्कन हुनुपर्ने माग गरे।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
