काठमाडौं– नेपालमा बिदेशी पर्यटकको आगमनमा नयाँ रेकर्ड कायम भएको छ। सन् २०१७ नेपालमा सबैभन्दा धेरै पर्यटक आएको वर्ष बन्न पुगेको छ।
अध्यागमन विभागका अनुसार सन् २०१७ मा ९ लाख ४० हजार २ सय १८ जना बिदेशी पर्यटक नेपाल आएका छन्। यसअघि सन् २०१२ सबैभन्दा धेरै पर्यटक नेपाल आएका थियो । त्यो वर्ष ८ लाख ३ हजार ९२ पर्यटक नेपाल आएका थिए। भूकम्पपछिको पुर्ननिर्माण र राजीतिक स्थिरताको कारण बन्द हडताल कम हूँदा पर्यटकको संख्या बृद्धि भएको अध्यागका विभागका निर्देशक कोशहरी निरौलाले बताए।
१ लाख ८७ हजार पर्यटक थपिए
सन् २०१६ को तुलनामा एक लाख ८७ हजार २ सय १६ जना धेरै पर्यटक नेपाल आएका छन्। सन् २०१६ मा ७ लाख ५३ हनार २ जना पर्यटक नेपाल आएका थिए। देशमा शान्ति प्रक्रिया सुरु भएपछि पर्यटकको संख्या निरन्तर बढेपनि सन् २०१३, १४ र १५ मा पर्यटकको संख्या घटेको थियो। देशको राजनीतिक अवस्था, भूकम्प तथा नाकाबन्दी जस्ता कारणले पछिल्लो दुई वर्ष पर्यटक आगमनमा असर गरेकोमा सन् २०१७ मा पर्यटकको आगमन उल्लेख्य बृद्धि भएको हो।
चिनियाँ मात्र एक लाख आए,तेस्रोमा अमेरिकन
सन् २०१७ मा नेपाल घुम्न आउनेमा सबैभन्दा धेरै भारतीय र चिनियाँ छन्। पछिल्लो वर्ष १ लाख ६० हजार ८ सय ३२ जना भारतीय नेपाल घुम्न आएका छन्। त्यस्तै चिनियाँ पर्यटकको संख्या अघिल्लो वर्षको बराबर छ । सन् २०१७ मा १ लाख ४ हजार ६ सय ६४ चिनियाँ पर्यटक नेपाल घुम्न आएका छन्। अघिल्लो वर्ष पनि १ लाख ४ हजार ५ जना चिनियाँ नेपाल आएका थिए।
छिमेकी देशपछि नेपाल घुम्न आउने बिदेशीमा अमेरिकन धेरै छन्। २०१७ मा ७९ हजार १ सय ६४ जना अमेरिकन नेपाल घुम्न आएका छन्। अघिल्लो वर्ष भारत र चीनपछि श्रीलङकन पर्यटकहरु धेरै आएकोमा पछिल्लो वर्ष नेपाल आउनेमा अमेरिकन तेसो स्थानमा छन् । गत वर्ष ५३ हजार मात्र अमेरिकन नेपाल घुम्न आएका थिए। पछिल्लो वर्ष श्रीलङकन पर्यटक पाँचौ स्थानमा परेका छन्।
५१ हजार ५८ जना बेलायती तथा ४५ हजार ३ सय ६१ श्रीलङकन पर्यटकन यो अवधिमा नेपाल आएका छन्। जर्मनीबाट २९ हजार ९ सय १८, जापानबाट २७ हजार ३ सय २६ तथा बंगलादेशबाट २९ हजार ६० जना नेपाल आएका छन्।
थाइल्याण्डबाट ३८ हजार एक सय ५४, कोरियाबाट ३४ हजार ३ सय १, अष्ट्रेलियाबाट ३३ हजार ३ सय ७१ तथा म्यानमारबाट ३० हजार ८ सय ५२ जना पर्यटक नेपाल आएका छन्।
सबैभन्दा धेरै अक्टोबर महिनामा पर्यटक आएका छन्। अक्टोबरमा एक लाख १२ हजार ४ सय ९२ जना पर्यटक नेपाल आएका थिए।
पछिल्लो दुई वर्षको तथ्याङक हेर्ने हो भने नेपालमा पर्यटकको आगमन ८० प्रतिशतले बृद्धि भएको छ । सन् २०१५ मा नेपालमा ५ लाख ३८ हजार ९ सय ७० जना पर्यटक नेपाल आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
