काठमाडौं– गुठी सम्बन्धी कानुनलाई संशोधन र एकीकरण गर्न बनेको विधेयक २०७६ राष्ट्रियसभाबाट फिर्ता भएको छ। भूमि व्यवस्था, सहकारी तथा गरिबी निवारण मन्त्री पद्माकुमारी अर्यालको 'गुठी विधेयक, २०७५ लाई फिर्ता गरियोस्' भन्ने प्रस्ताव सर्वसम्मतले पारित भएको हो।
फिर्ता गर्ने क्रममा आफ्ना भनाइ राख्दै मन्त्रीले अर्यालले भ्रम सिर्जना गर्दै विवादित बनाउने कोसिस भएको बताएकी छिन्। प्रतिपक्षी दल नेपाली कांग्रेसतर्फ संकेत गर्दै उनले भनिन्, ‘जसले विगतमा यो पेस गर्यो, उसैले सनातन धर्म र परम्परा मास्ने भ्रमात्मक प्रचार गर्यो।’ उनले गुठी परम्परा र सनातन धर्मको संरक्षणकै लागि विधेयक ल्याइएको समेत दाबी गरिन्। भनिन्, ‘चलेकै परम्परा सुव्यवस्थित गर्न यो विधेयक आएको हो।’
उनले गुठीसँग जोडिएको धर्मसंस्कृतिलाई सम्झिरहँदा किसानलाई भुल्न नहुने ठाउँमा सरकार रहेको अवगत गराइन्। उपत्यकाभित्र धर्म संस्कृति र बाहिर जग्गासँग जोडिएको विषय रहेको बताउँदै यी दुवैको व्यवस्थापन सरकारको दायित्व रहेको स्मरण गराइन्।
उनले भ्रम सिर्जना गरेर वास्तविकता राख्ने ठाउँ नभएको भन्दै दुखेसो पोखिन्। भनिन्, ‘सरकारले निजी गुठी खाइदियो भन्ने तीव्र विवाद उठाइयो। भ्रम सिर्जना गरियो। वास्तविक राख्ने ठाउँ भएन।’
उनले विषयवस्तुको गहिराइमा नगएर त्रास फैलाइएकोले फिर्ता लिनुपरेको बताइन्। कुनै पनि विधेयक हुबहु पारित नभएको उदाहरण पेस गर्दै छलफल गरेर संशोधन गर्ने ठाउँ हुँदाहुँदै पनि यसैमाथि टेकेर प्रतिपक्षी दलले सरकारसँग जोरी खोजेको उल्लेख गरिन्।
बैसाख १७ गते विधेयक राष्ट्रियसभामा दर्ता भएको थियो। बैसाख १९ गते सांसदहरूलाई वितरण गरिएको विधेयक जेठ ६ गते राष्ट्रियसभामा प्रस्तुत भयो।
जेठ १३ गते विधेयकमाथि राष्ट्रियसभा बैठकमा सामान्य छलफल गरियो। जेठ १९ गते गुठी संरक्षण पुचःले विधेयक सम्पदा विरोधी भएको भन्दै यसमाथि पुनर्विचार गर्न माग गर्यो। जेठ २८ गते विधेयकको विरोधमा माइतीघर मण्डलामा प्रदर्शन भयो। प्रदर्शनमा प्रहरीद्वारा पानीको फोहरा प्रहार हुनुका साथै केही व्यक्तिमाथि बुट बजारियो। जेठ ३१ गते दाङमा गुठी विधेयकको पक्षमा र ललितपुरमा विरोधमा प्रदर्शन भयो। असार १ गते विधेयकको विरोधमा भक्तपुर र जनकपुरमा प्रदर्शन भयो।
असार २ गते प्रधानमन्त्री केपी शर्मा ओलीले काठमाडौं उपत्यकाबाट निर्वाचित नेकपासम्बद्ध सांसदहरूसँग बालुवाटारमा छलफल गरे। असार ३ गते सरकारद्वारा विधेयक फिर्ता लिने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
