काठमाडौं- चुनावका लागि वाम गठबन्धन गर्दै पार्टी एकता गर्ने उद्देश्य राखेका नेकपा एमाले र माओवादी केन्द्रका अध्यक्षद्वयले बुधबार दिउँसो भेटवार्ता गरे। बहुप्रतीक्षित यो भेटवार्ताले दुई दलका शीर्ष तहको संवाद अघि बढाउँदै दुवै दल र नेताबीचको संशय हटेको सन्देश सञ्चार गर्यो।
राष्ट्रिय राजनीतिका पेचिलो मुद्दालाई ओझेल पार्दै माओवादी केन्द्रका अध्यक्ष पुष्पकमल दाहाल 'प्रचण्ड' गत शुक्रबार चितवन गएपछि सरकार गठनमा विभिन्न समीकरणका चर्चा बजारमा आए।
एमाले अध्यक्ष केपी ओली र संघीय समाजवादीका फोरमका अध्यक्ष उपेन्द्र यादवबीचको भेटले माओवादी केन्द्रका अध्यक्ष दाहाललाई समेत झस्काएको थियो। सोही क्रममा चितवनमा रहेका दाहालले एमाले अध्यक्ष ओलीले फोरमसँग मिलेर नयाँ सरकार गठनको असफल प्रयास गरेको टिप्पणी गरेका थिए।
त्यसअघि मधेसकेन्द्रित दलको समर्थनमा कांग्रेसले माओवादी केन्द्रलाई नयाँ सरकार गठनका लागि गरेको प्रस्तावले एमाले चिढिएको थियो। नयाँ सरकार गठनमा विभिन्न कोणबाट अंकगणित सुरु भएपछि निकट भविष्यमा हुने भनिएको एमाले र माओवादी पार्टी एकतामा समेत सन्देह पैदा भएको थियो।
राष्ट्रिय राजनीति राष्ट्रियसभा निर्वाचनको अध्यादेशमा अड्किरहँदा नयाँ सरकार गठन र पार्टी एकताका प्रक्रियाले गति लिन सकेको छैन। दुई शीर्ष नेताबीच बुधबारको भेट पार्टी एकता र नयाँ सरकार गठनमा दुवै दलभित्र र बाहिर पैदा भएको संशय हटाउन केन्द्रित थियो।
भक्तपुरको बालकोटस्थित ओली निवासमा बुधबार भएको भेटमा दुवै नेताले एकता प्रक्रियालाई अगाडि बढाउने विषयमा छलफल गरे। चुनावी परिणामपछि दुई दलबीच बढेको राजनीतिक दूरी घटाउन शीर्ष तहमा छलफल गरे।
भेटबारे एमाले अध्यक्ष ओलीका प्रेस संयोजक चेतन अधिकारीले भने, ‘दुई नेताबीच भएको छलफलमा नयाँ सरकार गठनको मार्ग प्रशस्त गर्न वर्तमान सरकार र निर्वाचन आयोगलाई आग्रह गर्ने तथा पार्टी एकताको विषयलाई अघि बढाउने सहमति भएको छ।’
चुनावी परिणामपछि माओवादी केन्द्रले पार्टी एकतामा जोड दिएको छ। वाम गठबन्धनको ठूलो दल एमालेले भने नयाँ सरकार र एकता प्रक्रियालाई सँगसँगै अघि बढाउने बताउँदै आएको छ।
दुवै दलले पार्टी एकताका लागि भन्दै पार्टी एकता संयोजन समिति गठन गरेका छन्। लामो समयदेखि बस्न नसकेको एकता संयोजन समितिको बैठक बिहीबार बस्ने तयारी छ।
एकता संयोजन समितिको बैठक बस्न नसक्दा वाम गठबन्धनको एकीकरण प्रक्रियामा धेरैले आशंका व्यक्त गर्न थालेका छन्। सोही विषयलाई ध्यानमा राख्दै दुवै दलका शीर्ष नेताले समितिको बैठक राखेर प्रक्रिया अगाडी बढाउन अग्रसरता लिएका हुन्। बुधबार दिउँसोको ओली-प्रचण्ड ‘वान टु वान वार्ता’ त्यसैको निरन्तरता हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
