राजविराज- नेपाल–भारत सीमा क्षेत्रमा बढेको चोरीनिकासी र व्यापारीको हित विपरीत स्थानीय तहले गर्ने सिफारिसका कारण नेपाली बजार सुनसान भएको भन्दै व्यापारीले शनिबार कञ्चनरुप नगरपालिकाको ध्यानाकर्षण गराएका छन्।
‘कर निर्धारण’का विषयमा नगरपालिका कार्यालयले आयोजना गरेको अन्तक्रियामा व्यापारीहरुले नगरमा व्यापारको अवस्था र व्यापारीको समस्याका विषयमा गुनासो गरेका हुन्।
कञ्चनरुप व्यापार संघका सचिव शशी साहले विवाह र श्राद्धका नाममा नगरपालिकाले नै व्यापारीलाई मारमा पार्ने काम गरेको आरोप लगाए। ‘विवाह र भोजका नाममा भारतीय बजारबाट सामान ल्याउन नगरपालिका नै सिफारिस गर्छ,’उनले भने,‘व्यापार भारतीयको बढाउने, कर चाहि हामीसँग असुल गर्ने?’
चाडबाड र भोज–भतेरका नाममा भईरहेको कर छलीको अवस्था नियन्त्रण गरेर मात्रै व्यापारीसँग कर असुल गर्ने विषयमा योजना वनाउन उनले आग्रह गरे।
संघका अध्यक्ष चन्दन गुप्ताले नगरपालिकाभित्रका सबै व्यापारीहरुसँग सल्लाह सुझाव लिएपछि मात्रै कर निर्धारणको विषयमा औपचारिक छलफल गर्न आग्रह गरे। कोषाध्यक्ष घनश्याम गुप्ताले सामान सस्तो पाइने नाममा भारतीय बजारमा नेपाली ग्राहक दैनिक रुपमा ठगिने गरेको बताए।
‘दुई–चार पैसाको लोभमा नेपालीहरु भारतीय बजारमा पुगेर ठगिदै आएका छन्,’ उनले भने,‘तर, स्थानीय निकाय र प्रशासन भने मुक दर्शक भएर वसेका छन्।’
व्यापारीको गुनासोपछि कञ्चनरुप नगरपालिकाका प्रमुख प्रशासकीय अधिकृत गोरखनाथ मिश्रले नगरको विकास निर्माणमा व्यापारीको महत्वपुर्ण भुमिका रहने भन्दै संस्थागत रुपमा सहकार्य गरेर अघि बढ्ने बताए।
कार्यक्रममा कर निर्धारणका लागि व्यापारीहरुको वृहत भेला वोलाएर पुनः छलफल गर्ने सहमति भएको मिश्रले बताए। कार्यक्रममा मेयर वसन्त मिश्र, उपमेयर निरु पोखरेललगायतका पदाधिकारी भने अनुपस्थित थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
