८० हजारमा लाइसेन्स बिक्रि, कर्मचारी अख्तियारको फन्दामा

अन्तर्वार्ता

नेपाल लाइभ मंगलबार, पुस ११, २०७४ ०३:१४

काठमाडौं– लिखित परिक्षा र ट्रायलबिना नै यातायात व्यवस्था कार्यालयबाटै ८० हजार रुपैयाँसम्म सवारी चालक अनुमती(लाइसेन्स) बिक्रि हुँदै आएको खुलेको छ। बिदेशी लाइसेन्स नेपालीकरणको नाममा यसरी लाइसेन्स बिक्रिको धन्दा चल्दै आएको हो।

यस्तो धन्दामा संलग्न यातायात व्यवस्था कार्यालय सुकेधाराका दुई कर्मचारी आइतबार पक्राउ परेका छन्। अख्तियार दुरुपयोग अनुसन्धान आयोगले ३२ हजार घुससहित नायब सुब्बा यादब पौडेल र खरिदार सुमन पोख्रेललाई पक्राउ गरेको हो। उनीहरुले बिदेशी लाइसेन्स नेपालीकरणको नाममा सयौं व्यक्तिहरुलाई लाइसेन्स बिक्रि गरेको प्रारम्भिक अनुसन्धानमा खुलेको छ।

सबै कागजपत्र नक्कली
बिदेशमा कुनै नेपालीले लाइसेन्स लिएको छ भने नेपालमा लाइसेन्स लिन फेरी परिक्षा र ट्रायल दिइरहनु नपर्ने प्रावधान यातायात व्यवस्था नियमावलीमा छ। खासगरी नेपालमा काम गर्ने बिदेशीहरुलाई लक्षित गरी यो प्रावधान राखिएको हो । तर,प्रावधानमा खेलेर लाइसेन्स बिक्रिको धन्दा चल्दै आएको छ।

त्यसरी बिदेशी लाइसेन्सलाई नेपालीकरण गर्दा सम्बन्धित देशस्थित नेपाली दुतावासको पत्राचार अनिवार्य गरिएको छ। तर, दलालहरुले लाइसेन्सदेखि दुतावासको पत्र समेत नक्कली बनाउदै आएका थिए। कर्मचारीसँग सेटिङ हुने भएकाले यातायात व्यवस्था विभागका कर्मचारीले पनि त्यसलाई प्रमाणित नगरीकनै लाइसेन्स जारी गर्दै आएका छन्। नयाँ लाइसेन्स लिनेहरुले यही चोरबाटो अपनाएर सवारी साधन चलाउदै नजान्नेलाई पनि लाइसेन्स दिदै आएका छन्।

अख्तियारका एक अधिकारीका अनुसार आइतबार बरामद गरिएको दुतावासको पत्र पनि नक्कली भएको पुष्टि भइसकेको छ। उनीहरुले साउदी अरेबियास्थित नेपाली दुतावासको पत्रका आधारमा लाइसेन्स नेपालीकरण प्रक्रिया अघि बढाएका थिए। तर साउदी दुतावासको पत्र नक्कली थियो, जून लेखापढी व्यवसायी सौरभ कार्की आफैंले बनाएका थिए। सोही आधारमा एक व्यक्तिलाई लाइसेन्स दिन लागिएको थियो। त्यसवापत ३२ हजार घुस लिएलगत्तै उनीहरु पक्राउ परेका हुन्। सो मुद्दामा अख्तियारले सरकारी कागजपत्र कीर्ते मुद्दामा पनि अनुसन्धानका लागि प्रहरीलाई पत्राचार गर्ने तयारी गरेको छ।

एउटा लाइसेन्सको ८० हजार
सुकेधारास्थित यातायात कार्यालयमा लाइसेन्सको व्यापक किनबेच हुने गरेको सूचनाका आधारमा तीन महिनाअघि महानगरीय प्रहरी कार्यालय रानीपोखरीले छापा हानी दुई बिचौलियालाई पक्राउ गरेको थियो । अनुसन्धानको क्रममा उनीहरुले सबै नक्कली कागजपत्रमार्फत लाइसेन्स नेपालीकरणको नाममा नयाँ लाइसेन्स बनाइदिने खुल्यो। परिसरका एक अधिकारीका अनुसार त्यसबापत आफुहरुले ८० हजार रुपैयाँसम्म लिने गरेको बताएका थिए। पक्राउ परेका बिचौलियाले नासु पौडेललाई पैसा बुझाउने गरेको बताएका थिए। तर, प्रहरीले पौडेललाई उन्मुक्ति दियो। उक्त घटनामा मुख्य बिचौलिया राज लामा पनि हालसम्म फरार छन्। स्रोतका अनुसार सुकेधारामा यातायात व्यवस्था कार्यालय सुरु भएयता मात्र २ हजारले नेपालीकरणका नाममा परिक्षा नदिई पैसाका भरमा लाइसेन्स लिएका छन्। एउटा लाइसेन्स मार्फत २५ हजारदेखि ८० हजार रुपैयाँसम्म लिने गरेका थिए।

पहिलेदेखि नै विभागको छानबिनमा
नेपालीकरणको नाममा लाइसेन्सको बिक्रि हुने गरेको सूचनाका आधारमा यातायात व्यवस्थाल विभागले पहिलेदेखि नै छानबिन गर्दै आएको छ । एकान्तकुनास्थित यातायात व्यवस्था कार्यालयबाट नेपालीकरणका नाममा भ्रष्टाचार बढेपछि विभागले त्यहाँबाट नेपालीकरण बन्द गराएको थियो। त्यसपछि सबै सुकेधारास्थित कार्यालयमा पुगेका थिए।
सुकेधारा कार्यालयमा पनि अनियमितताको सूचना पाएपछि विभागले छानबिन सुरु गरेको थियो। कार्यलय प्रमुख सुन्दर शर्मा लगायत कर्मचारीलाई विभागले सचेत गरासकेको थियो। तर कार्यालयका कर्मचारी घुसबाट टाढा हुन सकेनन्।

विभागका प्रवक्ता समेत रहेका निर्देशक डा.टोकराज पाण्डेले नेपालीकरणको नाममा हुने अनियमितताको विषयमा विभागले पहिलेदेखि नै अनुसन्धान गर्दै आएको बताए। दुरुपयोग रोक्न आफुहरुले नयाँ योजना बनाउने उनको भनाई छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नेपाल, थाइल्याण्ड र नेदरल्याण्ड्स सम्मिलित महिला टी२०आई श्रृंखला हुने

२००७ साल पछि कुनै पनि सरकारले नगरेको काम माओवादी नेतृत्वको सरकारले गरेको नारायणकाजीको दाबी

नागरिकता संशोधन विधेयक मन्त्रिपरिषद्‌बाट स्वीकृत, यी ३ व्यवस्था थपिए