बेइजिङ- चीनका राष्ट्रपति सी चिनपिङ राजकीय भ्रमणका क्रममा उत्तर कोरिया पुगेका छन्। २ दिने राजकीय भ्रमणका लागि सी बिहीबार बिहान उत्तर कोरियाको राजधानी प्योङयाङ पुगेका हुन्।
उत्तर कोरियाका प्रमुख नेता किम जोङ उनको निमन्त्रणामा उनी प्योङयाङ पुगेका हुन्। यी दुई नेताबीच आजै भेटवार्ता हुने बताइएको छ।
भेटवार्तामा परमाणु निशस्त्रीकरण, उत्तर कोरियाको अमेरिकासँगको वार्ता, नाकाबन्दी तथा आर्थिक मुद्दामा छलफल हुनेछ।
जापानमा हुन गइरहेको जी-२० शीखर सम्मेलनभन्दा अघि यी दुई नेताबीच भेटवार्ता हुन लागेकोले विश्व राजनीतिमा यसलाई निकै महत्वका साथ हेरिएको छ।
जापानमा सी र अमेरिकी राष्ट्रपति डोनाल्ड ट्रम्पबीच समेत भेटवार्ता हुने बताइएको छ। बुधबार मात्रै ट्रम्पले सीलाई टेलिफोन गर्दै भेटवार्ताको प्रस्ताव राखेका थिए। सो प्रस्तावमाथि सीले सकारात्मक रहेको बताएका थिए।
१८औं चिनियाँ नेसनल कंग्रेस भएपछिको एक वर्षमा मात्रै यी दुई नेताबीच ४ पटक भटवार्ता भइसकेको छ। विशेषगरी उत्तर कोरियाले सञ्चालन गर्दै आएको आणविक कार्यक्रमलाई लिएर संयुक्त राष्ट्र संघ, अमेरिकालगायत अन्तर्राष्ट्रिय शक्ति राष्ट्रहरुले लगाएको नाकाबन्दी फुकुवाको विषयमा यी दुई नेताबीच पटक-पटक भेटवार्ता भएको छ।
तर, २००५ पछि पहिलो पटक चिनियाँ राष्ट्राध्यक्षले पहिलो पटक उत्तर कोरियाको भ्रमण गर्न लागेका हुन्। २०१२ मा सत्ता सम्हालेपछि राष्ट्रपति सी पहिलो राजकीय भ्रमणका क्रममा प्योङयाङ पुगका हुन्।
यही वर्ष फेब्रुअरीमा भियतनामको राजधानी हनोईमा किम र ट्रम्पबीच भेटघाट भएको थियो। दुई देशका बीचमा परमाणु निशस्त्रीकरणमा सहमति भएको बताइए पनि कुनै परिणाम भने निस्किएको थिएन। बरु यही शीखर वार्ताबाट उत्तर कोरिया र अमेरिकाबीचमा दूरी बढेको बताइएको थियो।
पछिल्लो समय पुनः संवादको वातावरण बन्नसक्ने यो भ्रमणले देखाएको अन्तर्राष्ट्रिय मामिला जानकारहरु बताउँछन्। किनकी यसअघि भएका ट्रम्प-किम वार्ताको वातावरण बनाउन सीको महत्वपूर्ण भूमिका रहेको थियो।
विज्ञका अनुसार राष्टपति सी मात्र जान्दछन् कि हनोईमा के भएको थियो। र अब पनि चर्चा चलेअनुसार परमाणु निशस्त्रीकरणको बाँकी बाटो छ कि छैन। सीले यस बारेमा जापानमा ट्रम्पसँग केही महत्वपूर्ण छलफल गर्ने अनुमान गरिएको छ।
उत्तर कोरियाका लागि चीन प्रमुख व्यापार साझेदार हो। अहिले अन्तर्राष्ट्रिय प्रतिबन्धको सामना गर्नु परिरहेकोले कूटनीतिक रुपमा पनि उत्तर कोरियाका लागि चीन महत्वपूर्ण शक्ति रहेको बताइन्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।