काठमाडौं- वैदेशिक रोजगार विभागको पूर्व स्वीकृति बिना नै रोजगारीका लागि अन्तवार्ता लिइरहेको भन्ने उजुरी वैदेशिक रोजगार विभागमा पर्यो। ठूलो संख्यामा युवाहरुको अन्तर्वार्ता भइरहेको भन्दै विभागमा उजुरी परेको थियो।
सोही उजुरीका आधारमा बुधबार बत्तिसपुतलिस्थित द्वारिका होटल अगाडि रहेको अनुपम फुडल्यान्डमा विभागले छापा मार्यो।
अनुगमनका लागि खटिएको विभागको टोलीले फजल इन्टरनेसनल प्रालि, अल हायात म्यानेजमेन्ट प्रालि र मिता इन्टरनेसनललाई पूर्व श्रम स्वीकृति बिना नै अवैधानिक रुपमा अन्तवार्ता लिइरहेको अवस्थामा फेला पार्यो।
विभागको टोली पुग्दा करिब २ सय जना युवा अन्तर्वाता दिई सकेर घर फर्कने तयारी गरिरहेका थिए।
७ सयभन्दा बढी युवाको अवैधानिक अन्तर्वार्ता
अनुगमन टोलीका अनुसार सो फुडल्यान्ड परिसरमा ७ सयभन्दा बढी युवाले अन्तर्वाता दिएका छन्।
अन्तरवार्ता लिने मिता इन्टरनेसनल म्यानपावर प्रालिका सञ्चालकलाई अन्तर्वार्ताका लागि लिएको स्वीकृति र कम्पनीको पूर्वस्वीकृति प्रमाण माग गरिएको थियो। सो म्यानपावर कम्पनीले साउदीस्थित साउदी ग्राउन्ड सर्भिसका लागि मात्र जम्मा ५३ जना कामदारका लागि मात्रै अन्तर्वार्ता स्वीकृति लिएको देखिएको विभागका महानिर्देशक भीष्मकुमार भुसालले नेपाल लाईभलाई जानकारी दिए।
अन्तर्वार्ता दिने व्यक्तिलाई समेत विभागको अनुगमन टोलीले सोधपुछ गरेको थियो।
सोधपुछका क्रममा अन्तरवार्ता दिइरहेका युवाहरुले आफू साउदीमा के काममा जान लागेको र कुन कम्पनीमा जान लागेको समेत थाहा नभएको बताएका थिए।
अन्तर्वार्ताका लागि लाईनमा उभिएका युवाले आफूहरु ४५ दिनदेखि ३ महिनासम्मका लागि साउदीमा काम गर्न जान लागेको बताएका थिए।
म्यानपावर कम्पनीले तीन महिनाका लागि रोजगारी दिने भन्दै उनीहरुबाट प्रतिव्यक्ति २५ देखि ४५ हजारसम्म रुपैयाँ असुलेको भेटिएको छ।
साउदीमा ३ महिनाको रोजगारीमा भन्दै पठाउन लागिएका युवाहरुलाई मेडिकल र बीमा गर्न नपर्ने बताइएको थियो।
साउदी दूतावासको संलग्नता हुन सक्ने आशंका
अन्तर्वार्तास्थलमा साउदी दूतावासका प्रतिनिधिको समेत संलग्नता रहेको हुन सक्ने आशंका गरिएको छ।
अन्तर्वार्तास्थलमा साउदी दूतावासका कर्मचारी बताउने व्यक्ति भेटिएकाले दूतावासको संलग्नता हुन सक्ने आशंका गरिएको विभागका महानिर्देशक भुसालले जानकारी दिएका छन्।
‘हाम्रो अनुगमन टोली शंकास्पदस्थलमा पुगेर सोधपुछ गर्दा केही व्यक्तिले आफूहरु दूतावासको व्यक्ति भएको बताएकाले हामी आश्चर्यचकित भएका छौँ, अवैधानिक रुपमा अन्तर्वाता लिइरहेको स्थानमा दूतावासका प्रतिनिधिको संलग्नता कसरी रह्यो? हामी छानबिन गर्दैछौँ’ महानिर्देशक भुसालले भने।
दूवावासका कन्सुलर बताउने व्यक्तिले प्रयोग गरेको गाडी पनि दूतावासकै जस्तो देखिएकाले थप आशंका उब्जिएको अनुगमन टोलीले जानकारी दिएको छ।
तर अनुगमन टोलीले उक्त व्यक्तिलाई परिचय पत्र देखाउन अनुरोध गर्दा नदेखाएकाले दूतावासकै संलग्नता हो भनेर किटान गर्न नसकिएको महानिर्देशक भुसालको भनाई छ।
दूतावासको संलग्नता भएको पाइएमा छानबिन गरी परराष्ट्र मन्त्रालयमार्फत् कारबाही प्रक्रिया अघि बढाइने उनले बताए।
२४ घन्टाभित्र उपस्थित हुन निर्देशन
पूर्व स्वीकृति बिना भइरहेको अन्तवार्ता विभागको अनुगमन टोलीले रद्ध गरिदिएको छ। अन्तरवार्ता रद्ध गरेसँगै विभागले अवैधानिक रूपमा लिइरहेको अन्तर्वार्तामा संलग्न म्यानपावर कम्पनीलाई २४ घन्टाभित्र विभागमा उपस्थित हुन निर्देशन दिएको महानिर्देशक भुसालले बताए।
यो घटना गम्भीर र शंकास्पद रहेकाले थप कडाइका साथ छानबिन गरिने विभागले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
