काठमाडौं– गुण्डा नाइके भनेर चिनिएका राधाकृष्ण भण्डारी उर्फ राधे अहिले प्रहरी हिरासतमा छन्। जिल्ला प्रहरी कार्यालय धादिङका प्रमुख राजकुमार बैदवारका अनुसार उनीमाथि ज्यान मार्ने उद्योग र अभद्र व्यवहार मुद्दामा अनुसन्धान भइरहेको छ।
धादिङ तरुण दलको जिल्ला उपाध्यक्षसमेत रहेका राधेलाई छुटाउन भन्दै प्रहरीलाई चर्को दबाब पनि पर्दै आएको छ। राधेलाई फसाउन खोजिएको र तत्कालै उनलाई बिनासर्त रिहा गर्नुपर्ने माग तरुण दलले गर्दै आएको छ।
‘उहाँहरुको दाबी आफ्नो ठाउँमा छ। राधेको विगत वर्तमानबारे हामीले केही बताइराख्ने पर्दैन,' प्रहरी प्रमुख बैदवारले भने, 'उनको अपराध शृंखलाबारे सबै जानकार छन्।’
खटाइयो डिएसपी
केही घटनाले धादिङमा राधेको गुण्डागर्दी कतिसम्म छ भन्ने प्रष्ट पार्छ। धादिङ बेनीघाट रोराङ गाउँपालिका–३ स्थित मलेखु खोलाको निकासी ठेक्का यसपालि पनि राधेले हात पारे। ४ करोडको उक्त निकासी ठेक्कामा राधेले दाबी गरेपछि अरुले टेन्डर फिर्ता लिए। गतवर्षको मलेखु खोलाको निकासी ठेक्का पनि राधेले नै पाएका थिए।
धादिङमा राधेको राज चल्न थालेपछि बिनाप्रतिस्पर्धा उनैले टेन्डर हात पार्दै आएका छन्। टेन्डर हात परेपछि मलेखु खोलाबाट निर्माण सामग्रीको निकासी कर राधेकै समूहले उठाउँदै आएको छ।
बेनीघाट रोराङ गाउँपालिका–३ का वडाध्यक्ष भुवन त्रिपाठीका अनुसार राधे समूहले कानुनी रुपमै ठेक्का हात पारेपछि निकासी कर त्यही समूहले उठाउन थालेको हो। ‘यसमा म अरु केही भन्न चाहन्नँ,’ त्रिपाठीले भने।
ठेक्का आफैंले लिने र निकासी कर पनि आफैंले उठाउने भएपछि राधे समूहले उक्त क्षेत्रका क्रसर र गिट्टी बालुवा खानीमा चासो राख्न थालेको हो। धादिङ प्रहरीका अनुसार टेन्डर प्रक्रियादेखि अन्य विविध किसिमले राधे समूहले अवैध रकम उठाउँदै आएको छ। यसरी राधे समूहले आफ्नो सञ्जाल विस्तार गर्दै अवैध असुली मच्चाएपछि सो क्षेत्रमा सुरक्षा चुनौती थपिँदै गएको छ।
यो क्षेत्र इलाका प्रहरी कार्यालय गजुरी अन्तर्गत पर्छ। प्रहरी प्रधान कार्यालयले सुरक्षा चुनौती बढेको भन्दै इन्सपेक्टर प्रमुख रहने इलाका प्रहरी कार्यालय गजुरीमा हालैमात्र डिएसपी खटाएको छ। अहिले इन्सपेक्टरको दरबन्दीमा डिएसपी खगेन्द्रबहादुर खड्कालाई पठाइएको छ।
हेल्मेट काण्डबाट उघ्रिएको राधेको अपराधको बर्को अझै यथावत्
राधेको अपराधको चक्र पल्टाउन १२ वर्षअघि पुग्नुपर्ने हुन्छ।
२०६४ कात्तिक २४ गते धादिङकै गणेश ठकुरीको घरमा गएर टाउकोमा हेल्मेट प्रहार गरी घाइते बनाएको घटनाबाट राधेको गुण्डागर्दी बाहिर आएको हो। त्यसपछि बाहिर आएको उनको आपराधिक यात्रा अहिले पनि जारी छ।
प्रहरीका अनुसार राधे अवैध असुली, ठेक्कापट्टा, टेन्डरमा मात्र नभएर अन्य थुप्रै घटनामा पक्राउ पर्दै अदालतबाट छुटेका व्यक्ति हुन्। उनले धादिङ क्षेत्रलाई आधार बनाएर आपराधिक गतिविधि गर्दै आएका छन्।
महानगरीय अपराध महाशाखाका अनुसार सुरुमा दिनेश अधिकारी चरीको समूहमा रहेर राधे आपराधिक गतिविधि गर्थे। चरीसँग खटपट भएपछि उनी तरुण दलमा लागे।
२०७० असार २१ गते बा १०च ६९९३ गाडी रोकेर राधेसहितको समूहले चरीलाई खुकुरी प्रहार गरेर घाइते बनाएको थियो। सोही केशमा राधे २०७० साउन १३ पेस्तोलसहित पक्राउ परेका थिए। केही समय जेल परेर छुटे।
यस्तै, २०७४ असार ५ गते धादिङ नीलकण्ठ नगरपालिका वडा नम्बर ३ का २४ वर्षीय आयुष तामाङलाई राधेसहित उनको समूहले धारिलो हतियार प्रहार गरी घाइते बनाएको थियो। त्यो घटनामा राधे ‘फरार’ थिए। धादिङ प्रहरीले उनलाई देखे नदेखै गर्थ्यो। अहिले भने ज्यान मार्ने उद्योगमा पक्राउ परेर हिरासतमा छन्।
अपराधको नेक्सस ठेक्कापट्टामा, विकृति रोक्ने प्रयासमा संघीय सरकार तगारो!
राधे समूहको अपराधको नेक्सस ठेक्कापट्टासँग जोडिएको धादिङकै स्थानीय नेताहरुले बताउँदै आएका छन्। धादिङका केही जनप्रतिनिधि नै ठेक्कापट्टा तथा क्रसर व्यवसायबाट उदाएका व्यक्ति हुन्।
जसकारण खोलाजन्य पदार्थहरुमा उनीहरुको प्रभाव हुने नै भयो। त्यसपछि मौलाएको विकृति र आपराधिक यात्रा रोक्न भन्दै प्रदेश ३ को सरकारले केही काम गरे पनि त्यसले पूर्णता नपाएको ३ नबर प्रदेशका आन्तरिक मामिला तथा गृहमन्त्री शालिकराम जमरकट्टेल बताउँछन्।
‘प्राकृतिक स्रोतसाधनको दुरुपयोग रोक्न ३ नम्बर प्रदेश सरकारले केही काम थालेको थियो। तर संघीय सरकारले दिएन,’ उनले भने, ‘गत वर्ष ३ नम्बर प्रदेशका जिल्लाहरुमा भएका प्राकृतिक स्रोतसाधन र क्रसर उद्योगहरु नियमन गर्न कार्यविधि बनाइएको थियो। तर संघीय सरकारले अघि बढ्न दिएन।’
वातावरणीय प्रभाव मूल्यांकन (इआइए), प्रारम्भिक वातावरणीय मूल्यांकन (आइइई) हुने, घर भएको ठाउँमा घर छैन, जंगल भएको जंगल छैन भनेर रिपोर्ट देखाइदिने जस्ता विकृतिहरु पनि भएकाले प्राकृतिक स्रोतसाधनको दुरुपयोग भएको जमरकट्टेलको भनाइ छ। जसकारण आपराधिक पृष्टभूमि भएका व्यक्तिलाई प्राकृतिक स्रोतसाधनको दुरुपयोग गरी गैरकानुनी धन्दा चलाउन बढवा पुग्ने गरेको उनले बताए।
अपराध गर्नेले नै ठेक्का पाउने र उनीहरुले कर उठाउने भएपछि एकाधिकार हुने र अपराध बढ्ने गरेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
