काठमाडौं- इंग्ल्यान्डमा जारी १२औं आइसिसी विश्वकप क्रिकेटमा आइतबार भएको खेलमा भारत विजयी भएको छ। म्यानचेस्टरको ओल्ड ट्राफर्ड मैदानमा भएको खेलमा भारतले पाकिस्तानलाई डकवर्थ लुइस नियमका आधारमा ८९ रनले पराजित गरेको हो।
टस हारेर पहिले ब्याटिङ गरेको भारतले पाकिस्तानका सामु ३ सय ३७ रनको लक्ष पेस गरेको थियो। तर, पाकिस्तानले लक्ष पछ्याउँदै गर्दा वर्षाले खेल प्रभावित भएपछि उसले डकवर्थ लुइस नियमका आधारमा जितका लागि ४० ओभरमा ३ सय २ रनको नयाँ लक्ष पाएको थियो। पाकिस्तानले भने ६ विकेट गुमाएर २ सय १२ रन मात्र आफ्नो स्कोरबोर्डमा बटुल्न सक्यो।
कुनै समय २३.५ ओभरमा एक विकेटको क्षतिमा १ सय १७ रन बनाएर खेलिरहेको पाकिस्तानको त्यसपछि भने विकेट पतनको शृंखला सुरु भएको थियो। अनुभव भएका र राम्रो रन स्कोर गर्नसक्ने आँकलन गरिएका मिडल अर्डरका ब्याट्सम्यान नै एकपछि अर्को गर्दै पेवेलियन फर्किएपछि पाकिस्तान दबाबमा आएको थियो। पाकिस्तानले थप १२ रन जोड्दा महत्वपूर्ण ५ विकेट गुमाइसकेको थियो।
दोस्रो विकेटको रुपमा बाबर आजम ४८ रन बनाएर कुलदीप यादवको बलमा बोल्ड भएपछि पाकिस्तानको विकेट पतको शृंखला सुरु भएको हो। आजमसँग दोस्रो विकेटका लागि १ सय ४ रनको महत्वपूर्ण साझेदारी गरेका फाकर जमान ६२ रनको निजी स्कोरमा कुलदीपकै बलमा युजवेन्द्र चाहलको हातबाट समातिए।
यसपछि मोहम्मद हाफिज ९ रन र टोलीकै अनुभवी ब्याट्सम्यान सोयब मलिक गोल्डन डक आउट हुन पुगे। यी दुबै हार्दिक पान्ड्याको सिकार भएका थिए।
कप्तान सरफराज अहमदले पनि कमजोर हालतमा पुगेको टोलीको अवस्थालाई टेको दिन सकेनन्। व्यक्तिगत १२ रनको अवस्थामा उनी विजय शंकरको दोस्रो सिकार भए। यसअघि विजयले प्रामरम्भिक ब्याट्सम्यान इमाम उल हकलाई आउट गरेका थिए।
पाकिस्तानको स्कोर ३५ ओभरमा ६ विकेटको क्षतिमा १ सय ६६ रनको अवस्थामा खेलमा वर्षा बाधक बन्यो। त्यसपछि पाकिस्तानले ४० ओभरमा ३ सय २ रनको नयाँ लक्ष पाएको थियो।
अन्तिमसम्मै क्रिजमा रहेका इमाद वसीमले ४६ र सादव खानले २० रनको पारी खेले पनि त्यो जीतका लागि पर्याप्त भएन।
भारतका कुलदीप यादव, हार्दिक पान्ड्या र विजय शंकरले समान २/२ विकेट आफ्नो नाममा लेखाए।
यसअघि टस जितेर पहिले फिल्डङ रोज्ने पाकिस्तानको निर्णयलाई भारतको प्रारम्भिक जोडी रोहित शर्मा र के एल राहुलले गलत सावित गरिदिए। पहिलो विकेटका लागि १ सय ३६ रनको साझेदारी गरेको यो जोडीले भारतलाई सटिक सुरुवात दिएको थियो।
रोहितले शतकीय पारी खेले। १ सय १३ बलको सामना गरेका उनले १३ चौका र ३ छक्काको मदतमा १ सय ४० रनको योगदान दिए। राहुलले ५७ रन बनाए।
भारतका कप्तान विराट कोहलीले पनि अर्धसतकीय पारी खेले। उनले रोहितलाई गतिलो साथ दिएका थिए। विराटले ७७ रन बनाउँदा हार्दिकले २६ र विजयले १५ रन बनाए।
पाकिस्तानका लागि मोहम्मद आमिरले ३ तथा हसन अली र वाहव रियाजले सामान १/१ विकेट हात पारे।
हालसम्म विश्वकपमा भएका सबै खेलमा भारतसँग हारको सामाना गरेको पाकिस्तानले यसपटक पनि आँकडा सुधार्न सकेन। विश्वकपमा ७ खेल खेलेको पाकिस्तानले भारतलाई सबै खेल सुम्पिएको छ। भारत र पाकिस्तानबीचको खेललाई विश्वभर निकै महत्वपूर्ण र चासोको रुपमा हेरिने गरिए पनि विश्वकपमा पाकिस्तानले भारतलाई कडा चुनौती दिन सधैं असफल भएको छ।
सन् १९९२ को विश्वकपमा पहिलो पटक भारत र पाकिस्तान आमनसामने भएका थिए। १९७५ मै विश्वकप सुरु भए पनि सन् १९८७ सम्म भने यी दुई टोलीबीच विश्वकपमा कुनै खेल भएको थिएन। अष्ट्रेलियामा भएको १९९२ को विश्वकपमा पहिलो जित निकालेको भारतले २७ वर्षसम्म पनि पछाडि फर्केर हेर्नु परेको छैन।
जितसँगै भारत अंक तालिकाको तेस्रो स्थानमा उक्लिएको छ। ४ खेलमा ३ मा जित हात पारेको भारत न्युजिल्यान्डसँग सामान अंक भए पनि रनरेटका आधारमा तेस्रो स्थानमा छ। यी दुवै टोलीभन्दा एक खेल बढी खेलेको अष्ट्रेलिया अंक तालिकाको पहिलो स्थानमा छ।
५ खेलमा १ मा मात्रै जित हात पारेको पाकिस्तान पुछारबाट दोस्रो स्थानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765782108.png)
-1764146706.png)
-1763721444.png)
-1765273665.jpg)
