काठमाडौं- कप्तान एरोन फिन्चको किर्तिमानी ब्याटिङसँगै विश्वकप क्रिकेटअन्तर्गत शनिबार भएको पहिलो खेलमा अष्ट्रेलियाले श्रीलंकालाई पराजित गरेको छ। जितसँगै अष्ट्रेलिया अंक तालिकाको शीर्ष स्थानमा उक्लिएको छ। अष्ट्रेलियाले श्रीलंकालाई ८७ रनले पराजित गरेको हो।
टस हारेर पहिले ब्याटिङका लागि मैदानमा उत्रिएको अष्ट्रेलियाले श्रीलंकासामु ३ सय ३५ रनको लक्ष पेस गरेको थियो। अष्ट्रेलियाली कप्तान फिन्चले १ सय ५३ रनको पारी खेल्दै श्रीलंकासामु सुदृढ योगफल खडा गर्न सफल भएका थिए। उक्त शतकीय पारीमा फिन्चले १ सय ३२ बलको सामना गर्दै १५ चौका र ५ छक्का हिर्काएका थिए।
यसैका साथ उनले विश्वकपमा कुनै पनि अष्ट्रेलियाली कप्तानले एक म्याचमा सबैभन्दा बढी रन बनाउने यसअघिको किर्तिमान तोडे। यसअघि यो किर्तिमान पूर्वकप्तान रिकी पोन्टिङको नाममा थियो। उनले २००३ को विश्वकपमा भारतविरुद्ध १ सय ४० रनको पारी खेलेका थिए।
विश्वकपमा सबैभन्दा बढी रन बनाउने किर्तिमान न्युजिल्यान्डका ब्याट्सम्यान मार्टिन गुप्तिलको नाममा छ। उनले २०१५ को विश्वकपमा वेस्टइन्डिजविरुद्ध अविजित २ सय ३७ रन बनाएका थिए।
एरोन फिन्चलाई ४३औं ओभरमा इसुरु उडानाले करुणारत्नेको हातबाट क्याच आउट गराएका थिए। फिन्चबाहेक स्टेभन स्मिथले ७३ र ग्लेन मैक्सवेलले ४६ रनको योगदान दिए।
३ सय ३५ रनको लक्ष पछ्याएको श्रीलंका ४६ ओभर मात्रै मैदानमा टिक्न सक्यो। श्रीलंका २ सय ४७ रनमै सीमित भएको थियो।
श्रीलंकाका दिमुत करुणारत्ने ३ रनले शतक प्रहार गर्नबाट चुके। कुसल परेराले ५२ रन बनाए। पहिलो विकेटका लागि करुणारत्ने र परेराले १ सय १५ रनको साझेदारी गर्दै श्रीलंकालाई बलियो सुरुवात दिलाएका थिए। तर, १६औं ओभरपछि कुनै पनि खेलाडी लामो समय मैदानमा टिक्न सकेनन्।
प्ररम्भिक सतकीय साझेदारीपछि कुनै पनि जोडीले अर्धशतकीय साझेदारी बनाउन सकेनन्।
अष्ट्रेलियाका तर्फबाट मिचेल स्टार्कले ४, केन रिचर्डसनले ३ र प्याट कमिन्सले २ विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
