धनगढी- कैलाली प्रहरीले भारतको पञ्जाबस्थित लुधियानाबाट सुनका गरगहना तथा नगद चोरी गर्ने समूहलाई पक्राउ गरेको छ।
एक महिनाअघि भारतको लुधियानाको गुरुदेवनगरस्थित नन्द किशोरको घरबाट नगद तथा सुनका गरगहना चोरी गर्ने गिरोहलाई कैलालीका विभिन्न स्थानबाट पक्राउ गरी प्रहरीले शुक्रबार सार्वजनिक गरेको हो।
चोरीमा संलग्न रहेका कञ्चनपुरको कृष्णपुर नगरपालिका-४ का ३८ वर्षीय मानबहादुर कार्की, वडा नम्बर ५ का ४३ वर्षीय सन्तोष भट्टराई, कैलालीको गौरिगंगा नगरपालिका-८ का २१ वर्षीय कुमार भुल र गोदावरी नगरपालिका-७ का २८ वर्षीय योगेन्द्र विकलाई पक्राउ गरेको प्रहरीले जनाएको छ।
पुनम मल्होत्राले सिसिटिभी फुटेजसहित कैलाली प्रहरी कार्यालयमा ४ जनाविरुद्ध उजुरी दिएकी थिइन्। कैलाली जिल्ला प्रहरी प्रमुख एसपी सुदीप गिरीले भने, '४ जनाविरुद्ध उनीहरूको फोटोसहितको उजुरी आएको थियो। मानबहादुर पक्राउ परेपछि अरुलाई पक्राउ गर्न सफल भयौं।'
प्रहरी उपरीक्षक गिरीका अनुसार मानबहादुर सहितका अभियुक्तहरूबारे अनुसन्धानका क्रममा यस गिरोह भारतका अन्य ठाउँमा भएका चोरी घटनामा समेत संलग्न रहेको पाइएको छ। एसपी गिरीले गिरोहका अन्य सदस्यहरूको पनि खोजी भइरहेको बताए।
प्रहरीले अभियुक्तहरूको साथबाट अमेरिकी डलर, भारतीय तथा नेपाली नोट, सुन तथा सुनका गरगहना बरामद गरेको छ। प्रहरीले उनीहरूको साथबाट १ लाख ४७ हजार ५ सय भारतीय रुपैयाँ, ९२ हजार ५ सय नेपाली रुपैयाँ, एक सय ३० अमेरिकी डलर तथा ५ सय हंगेरीको मुद्रा बरामद गरेको जनाएको छ।
त्यस्तै, उनीहरूसँगबाट २७ ग्राम ५ सय ३० मिलिग्राम सुनको सिक्री, ८ ग्राम ८० मिलिग्राम सुनको औँठी, १ ग्राम ४ सय मिलिग्राम सुनको टुक्रा, सुनको हार, बाला ठूलो दुई थान र सानो बाला ६ थान, चुरामा लगाएको सुनको बाला २ थान, सिक्का ५ थान, कानमा लगाउने टप एक जोडी, तथा सिक्री एक थान बरामद गरेको छ।
पीडित मल्होत्राले छोरीको विवाहका लागि जम्मा गरेको सम्पूर्ण गरगहना र नगद चोरी भएको बताइन्। उनले भनिन्, 'विश्वास गरेर काममा राखेका यिनीहरूले योजनाबद्ध ढंगले घरको ढोका तथा लकर तोडेर नगद र गरगहना चोरेछन्।'
जिल्ला प्रहरी प्रमुख गिरीले यो समूहले भारतमा घरमा काम गर्न एकअर्कालाई पठाउने र घरमा सम्पत्ति राखेको स्थान पहिचान गरि चोर्ने योजना बनाउने गरेको प्रारम्भिक अनुसन्धानबाट खुलेको बताए।
उनले चोर गिरोहमा महिला सदस्यसमेत रहेको पाइएको जानकारी दिए। चोर गिरोहले घरमा काम गर्ने कामदारलाई लागुपदार्थ खुवाएर बेहोस बनाउने तथा घरमा चोरी गरेर प्रायः भारतको लखिमपुर हुँदै कञ्चनपुरको पुनर्वास प्रवेश गर्ने गरेको पाइएको गिरीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
