काठमाडौं– भर्खरै सम्पन्न प्रतिनिधिसभा र प्रदेशसभा निर्वाचनमा पराजित भएका ३ उम्मेदवार मतपरिणाम उल्ट्याउन माग गर्दै सर्वोच्च अदालत पुगेका छन्।
नेपाली कांग्रेसका नेता तथा पूर्व खानेपानी तथा सरसफाइ राज्यमन्त्री दिपक खड्का, कांग्रेसकै युवानेता प्रदीप पौडेल र माओवादी केन्द्रका बिना विभागीय मन्त्री रामसिंह यादवले सर्वोच्चमा रिट दायर गरेका छन्।
संखुवासभा प्रतिनिधिसभा निर्वाचन क्षेत्र नम्वर १ मा नेकपा एमालेका उम्मेदवार राजेन्द्रप्रसाद गौतमसँग पराजित भएपछि खड्का उक्त मतपरिणाम उल्ट्याउन माग गर्दै सर्वोच्च पुगेका हुन्। एमालेका गौतमले ३२ हजार ७ सय ६९ र कांग्रेसका खड्काले ३१ हजार ६ सय ३९ मत ल्याएका थिए। खड्का ११ सय ३३ मतले पराजित भएका हुन्। खड्काले पुस ५ मा रिट दायर गरेका हुन्।
तनुहँ क्षेत्र नम्वर २ को प्रदेशसभा (क) मा उम्मेदवार बनेका पौडेल ५ मतले माओवादी केन्द्रकी उम्मेदवार तथा बिना विभागीय मन्त्री आशा कोइरालासँग पराजित भएका थिए। कोइरालाले १६ हजार ६ सय ४६ मत पाउँदा पौडलले १६ हजार ६ सय ४१ मत पाएका थिए।
४२ मत दुई पटक गणना गर्दै आफूलाई पराजित घोषणा गरेकाले पुनः मतगणना हुनुपर्ने मागसहित पौडेल पुस ६ मा सर्वोच्च पुगेका हुन्।
धनुषा क्षेत्र नम्वर ३ मा तेस्रो स्थानमा पुगेका माओवादी केन्द्रका बिना विभागीय मन्त्री रामसिंह यादवले पनि सर्वोच्चमा निर्वाचन परिणाम विरुद्ध रिट दर्ता गराएका हुन्। उनले निर्वाचन परिणाम अस्वीकार गर्दै पुस ३ मा रिट हालेका हुन्। धनुषा ३ मा राष्ट्रिय जनता पार्टी (राजपा) अध्यक्ष मण्डलका नेता राजेन्द्र महतोले नेपाली कांग्रेसका नेता विमलेन्द्र निधिलाई हराएका हुन्। मन्त्री यादवले २ हजार ३ सय ४६ मत मात्र ल्याएका थिए। जबकि महतो ३० हजार ७ सय ५० मत प्राप्त गरी निर्वाचित भएका थिए भने निकटतम प्रतिद्वन्द्वि पूर्वगृहमन्त्री निधिले २७ हजार ८ सय ४७ मत प्राप्त गरेका थिए।
उनीहरुको रिट प्रधानन्यायाधीश सहितको संवैधानिक इजलाशमा सुनुवाई भइरहेको छ। उनीहरुको रिटमा निर्वाचनमा विजयी हुने पक्षले धाँधली गरेको जिकीर गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
