हत्या गरी पोखरीमा फालिएको अवस्थामा मलङ्गवा नगरपालिकाका कर्मचारीको शव फेला

नेपाल लाइभ | २०७६ जेठ ३० बिहीबार | Thursday, June 13, 2019 १०:२३:०० मा प्रकाशित

सर्लाही- सर्लाही सदरमुकाम मलङ्गवाको बजार क्षेत्रमा रहेको जनसागर पोखरीमा एक युवाको शव फेला परेको छ। फेला परेको शव मलङ्गवा नगरपालिका–४ बस्ने ३० वर्षीय रवि मेस्तरको रहेको खुलेको छ। ना२ह १२२३ नम्बरको टेम्पोसहित उनको शव पोखरीमा फेला परेको हो।

मृतकको शरीरभरि गहिरो घाउ देखिएकाले उनलाई कसैले हत्या गरेर पोखरीमा फालेको हुनसक्ने स्थानीयवासीको अनुमान छ। शव परीक्षणपछि मात्र घटनाबारेमा केही भन्न सकिने सर्लाहीका प्रहरी प्रवक्ता एवम् प्रहरी नायब उपरीक्षक प्रतितसिंह राठोर बताए। मृतक मेस्तरलाई अन्य ठाउँमा हत्या गरेर टेम्पोमा राखेर पोखरीमा फालेको हुनसक्ने स्थानीयवासीको भनाइ छ।

मृतक मेस्तर मलङ्गवा नगरपालिकामा सरसफाइ गर्ने कर्मचारी हुन्। शवसँगै पानीमा फेला परेको टेम्पो मृतकका आफ्नै काका मिश्रीलाल मेस्तरको रहेको र उनी अहिले सम्पर्कविहीन रहेको प्रहरी नायब उपरीक्षक राठोरले जानकारी दिए।

पोखरीमा टेम्पो खसेको अवाज सुनेर राति करीब ११ः३० बजे नै मृतकको शव स्थानीयवासीले निकालेका थिए भने टेम्पो आज बिहान प्रहरीले डोजरको सहयोगले निकालको छ। शव परीक्षणका लागि सर्लाही अस्पताल मलङ्गवामा राखिएको छ। रासस