काठमाडौं- साताव्यापी युरोप भ्रमणमा रहेका प्रधानमन्त्री केपी शर्मा ओली दुईदिने बेलायत भ्रमण सकेर आज फ्रान्स प्रस्थान गर्दैछन्।
स्विटजरल्यान्डको जेनेभामा अन्तर्राष्ट्रिय श्रम संगठन (आइएलओ) शतवार्षिकी समारोहलाई सम्बोधन गरेर बेलायत भ्रमणमा पुगेका प्रधानमन्त्री ओली त्यहाँको दुईदिने भ्रमण सकेर आज फ्रान्स प्रस्थान गर्न लागेका हुन्। दुईदिने बेलायत बसाइका क्रममा प्रधानमन्त्री त्यहाँकी प्रधानमन्त्री थेरेसा मे र राजकुमार ह्यारीसँग भेट गरेका थिए।
भेटका क्रममा ओलीले गोर्खा सैन्य भर्तीसम्बन्धी नेपाल, भारत र बेलायतबीच भएको त्रिपक्षीय सन्धिको व्यापक पुनरावलोकन गर्ने सम्बन्धमा कुरा उठाएको बताइएको छ।
प्रधानमन्त्री मेलाई ओलीले मंगलबार अपराह्न बेलायती प्रधानमन्त्रीको कार्यालय टेन डाउनिङ स्ट्रिटमा भेटेका थिए।
प्रधानमनत्री ओलीका प्रेस सल्लाकार कुन्दन अर्यालका अनुसार मेसँगको संक्षिप्त भेटमा ओलीले सन् १९४७ मा बेलायत, भारत र नेपालबीच भएको त्रिपक्षीय सन्धियता परिस्थिति निकै बदलिइसकेकाले त्यसको पुनरवलोकन गर्नुपर्ने भनाइ राखेका थिए।
.JPG)
मेसँगको भेटबारे सञ्चारकर्मीलाई प्रतिक्रिया दिएका परराष्ट्रमन्त्री प्रदीप ज्ञवालीले पनि प्रधानमन्त्री ओलीले समकक्षी मेसँग सन् १९४७ मा गोर्खा सैनिक भर्ना सम्बन्धी त्रिपक्षीय सन्धी पुनरावलोकनको कुरा उठाएको बताए। नेपालले कुरा राखेपछि बेलायती प्रधानमन्त्री मेले त्यसलाई ‘नोटमा लिएको’ ज्ञवालीले जानकारी दिएका थिए।
भेटका क्रममा ओलीले भूतपूर्व गोर्खा सैनिकहरूका केही मागलाई सम्बोधन गरेकोमा बेलायत सरकारलाई धन्यवाद दिएका थिए।
मेले गोर्खा सैनिकहरूको ऐतिहासिक योगदानको प्रशंसा गर्दै यो विषयबारे आफ्ना उत्तराधिकारीलाई जानकारी गराउने प्रतिबद्धतासमेत जनाएको मन्त्री ज्ञवालीले जानकारी दिए। समकक्षी मेसँग भेट्नुअघि प्रधानमन्त्री ओलीले मंगलबार बिहान लन्डनस्थित नेपाली दूतावासमा भूतपूर्व गोर्खा सैनिकका विभिन्न संस्थाका अगुवाहरूलाई भेटेका थिए।
प्रधानमन्त्री ओलीसँगको छफलमा गोर्खा सैनिकहरूले निवृत्तिभरण लगायतका विषयमा आफूहरूलाई भेदभाव गरिएको बताउँदै आफ्ना मागहरू सम्बोधन नगरिए फेरि नयाँ चरणको आन्दोलन थाल्ने चेतावनी दिएका थिए।
गोर्खा सैनिकहरुले ओलीलाई दिएको सम्मान
तर बेलायत सरकारले भूतपूर्व गोर्खा सैनिकहरूप्रति भेदभाव भएको भन्ने आरोपलाई अस्वीकार गर्दै आएको छ।
बेलायती सरकारले गत मार्च महिनामा भूतपूर्व गोर्खा सैनिकहरूको पेन्सन ३४ प्रतिशतसम्म बढाइने घोषणा गरेको थियो। भूतपूर्व गोर्खा सैनिकहरूले भने सन् १९९७ भन्दा अघि सेवानिवृत्त भएका बेलायती सैनिकहरूको तुलनामा आफूहरूले पाउने पेन्सन अझै निकै कम रहेको बताउने गरेका छन्।
सत्तारूढ कन्जर्भेटिभ पार्टीको नेता पदबाट राजीनामा दिएर कामचलाउ प्रधानमन्त्री बनेकी मेसँगको भेटपछि प्रधानमन्त्री ओलीले बेलायती राजपरिवारका राजकुमार ह्यारीसँग भेट गरेका थिए।
मंगलबार नै केन्सिङ्टन प्यालेसमा पत्नी राधिका शाक्यसहित गएर प्रधानमन्त्री ओलीले राजकुमार ह्यारीलाई भेटेका हुन्। ह्यारीले ३ वर्षअघि नेपालको भ्रमण गरी गोर्खा जिल्लामा भूकम्पबाट भत्किएको एउटा विद्यालय पुनर्निर्माणमा सघाएका थिए।
बेलायती सेनामा केही समय काम गरेका उनले अफगानिस्तानमा कार्यरत गोर्खा सैनिकहरूसँगै केही दिन बिताएका थिए। उनले सार्वजनिक रूपमै गोर्खा सैनिकहरुको प्रशंसा गर्ने गरेका छन्।
प्रधानमन्त्री ओलीले विपक्षी दलका नेता जेरेमी कोर्बिनसँग पनि भेटेका थिए। त्यस्तै उनले त्यहाक सांसदहरूको सर्वदलीय समूहलाई सम्बोधन पनि गरेका थिए।
भूमिगत रेल चढेर फ्रान्स जाँदै
बेलायतको दुईदिने भम्रण सकेर प्रधामनमन्त्री ओली आज फ्रान्स प्रस्थान गर्दैछन्। प्रधानमन्त्री ओली दिउँसो बेलायतको लन्डनबाट सार्वजनिक रेल चढेर पेरिस जाने कार्यक्रम रहेको छ।
विमानबाट जाँदा विमानस्थलमा लामो समय लाग्ने भएकाले छिटो यात्राका लागि रेलबाट आउन लागेको फ्रान्सका लागि नेपाली राजदूत दीपक अधिकारीले बताए।
फ्रान्स र बेलायतबीच समुद्रमुनि अवस्थित ‘युरो टनेल’ भनिने भूमिगत रेलमार्ग हुँदै ओली फ्रान्स जानेछन्।
फ्रान्स भ्रमणको क्रममा प्रधानमन्त्री ओलीले बिहीबार फ्रान्सका प्रधानमन्त्री फिलिप एडुवार्डसँग औपचारिक वार्ता गर्ने तय भएको छ। दुई समकक्षीबीच बिहीबार बेलुका ५ बजे हुने त्यो भेटघाट करिब एक घन्टासम्म चल्ने बताइएको छ ।
नेपाल र फ्रान्सबीच कूटनीतिक सम्बन्ध भएको ७०औं वर्ष भएकाले दुई देशको कूटनीतिक सम्बन्धलाई अझै विस्तार गर्ने र आर्थिक तथा सांस्कृतिक सहकार्यका विषयमा उक्त भेटघाटमा छलफल हुने छ।
नेपालको परराष्ट्र मन्त्रालका अनुसार आफ्ना समकक्षीसँगको वार्तापछि प्रधानमन्त्री ओलीले बिहीबार साँझ नै राष्ट्रियसभामा मैत्री समूहका अध्यक्ष भेरोनिक रिओतोंलाई भेट्नेछन्। राष्ट्रियसभाले आयोजना गर्ने रात्रिभोजमा पनि उनी सहभागी हुने कार्यक्रम छ।
प्रधानमन्त्री ओलीको भ्रमणलाई फ्रान्सको राष्ट्रियसभा अन्तर्गत नेपाल—फ्रान्स मैत्री समूहले सहजीकरण गर्नेछ। प्रधानमन्त्री ओलीले फ्रान्सेली संसदीय टोलीलाई नेपाल भ्रमणको निम्तोसमेत दिनेछन्।
पेरिस रहँदा ओलीले त्यहाँ व्यापारिक समुदायका प्रतिनिधिसँग अन्तरक्रिया गर्नेछन्। त्यस्तै प्रधानमन्त्री ओलीले युरोपमा रहेका नेपाली राजदूतहरुलाई समेत सम्बोधन गर्ने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
