राजधानीमा आपराधिक क्रियाकलाप गरी गैरकानुनी सम्पत्ति आर्जन गरेको आरोपमा सम्पत्ति शुद्धीकरणको मुद्दा खेपिरहेका गुन्डा नाइकेमध्ये राजीव गुरुङ (दीपक मनाङे) प्रदेशको सांसद भइसक्दा अन्य भने विशेष अदालतमा फैसलाका लागि धाइरहेका छन्।
मनाङेले विशेष अदालतबाट भदौ ५ गते सम्पत्ति शुद्धीकरणको मुद्दाबाट सफाइ पाएका थिए। एकै दिन मुद्दा खेपेका अन्य ४ जना गुन्डा नाइकेहरुको अन्तिम सुनुवाइ चलिरहेको छ।
गैरकानुनी रुपमा सम्पत्ति आर्जन गरेको अभियोग लागेका दीपक मनाङे, चक्रे मिलन, गणेश लामा, पर्शुराम बस्नेत र अभिषेक गिरी विरुद्ध चार वर्षअघि सम्पत्ति शुद्धीकरण मुद्दा दायर गरिएको थियो।
कुनै समय मनाङेकै सहयात्री रहेका र पछि परस्परका दुश्मन बनेका चक्रे मिलनको अन्तिम सुनुवाइ मंगलबारबाट सुरु भएको छ। न्यायाधीशहरु द्वारिकामान जोशी, चण्डीराज ढकाल र नारायणप्रसाद पोखरेलको इजलासमा सुरु भएको छ।
एक महिनाभित्र चारै अभियुक्तको मुद्दा फैसला हुने क्रममा रहेको विशेष अदालतका रजिष्ट्रार भीमप्रसाद श्रेष्ठले बताए। न्यायाधीशले फैसलाका लागि बहस नोट माग्ने क्रम र केही व्यक्तिको अन्तिम बहस सुरु भएको श्रेष्ठले बताए।
कुनै समय काठमाडौंलाई आधार क्षेत्र बनाएर आपराधिक क्रियाकलापमा संलग्न हुँदै राजनीतिमा अवतरण गरेका मनाङे मनाङको प्रदेश ‘क’ बाट सांसद बनिसकेका छन्। उनले सफाइ पाए पनि सम्पत्ति शुद्धीकरण मुद्दा खेपिरहेका अन्य ४ जना भने अन्तिम सुनुवाइको पालो पर्खेर बसेका छन्।
अर्थ मन्त्रालय मातहत रहेको सम्पत्ति शुद्धीकरण विभागले ५ जना गुन्डा नाइकेको सम्पत्तिबारे अनुसन्धान गर्दै ०७० जेठ ५ मा विशेष अदालतमा मुद्दा दायर गरेका थियो। गुन्डा नाइकेहरुको अवैध सम्पत्तिबारे अनुसन्धान गर्न र मुद्दा अदालतसम्म पुर्याउन चार वर्ष लागेको थियो।
विभागसँगको समन्वयमा नेपाल प्रहरीको केन्द्रीय अनुसन्धान ब्युरो (सिआइबी) ले सबैको सम्पत्ति विवरणको अनुसन्धान गरेको थियो। अनुसन्धानमा गणेश लामाको सम्पत्तिको लामो फेहरिस्त देखिएको थियो। लामा र उनको परिवारका नाममा विभिन्न कम्पनी, पेट्रोल पम्प र जग्गामा प्रशस्त लगानी रहेको देखिएको थियो।
लामाको नाममा काठमाडौं, भक्तपुर र ललितपुरमा २ सय ५ रोपनी जग्गाका साथै २७ करोड अवैध सम्पत्ति रहेको दाबी गरिएको थियो।
यस्तै, पर्शुराम बस्नेतका सहयोगी मुकेश बस्नेतको नाममा मोरङमा ४२ रोपनी जग्गा, तीन वटा गाडी, एडजोन एडभर्टाइजिङ, पिआर हार्डवेयर, बगलामुखी बिल्डर्स, गजलक्ष्मी ट्रेड, मेरो ट्राभल्स, वेलकम पार्टी प्यालेस र टेकेन्द्र निर्माण सेवा लगायतमा लगानीसहित ११ करोड अवैध सम्पत्ति रहेको अभियोग छ।
चक्रे मिलनको नाममा काठमाडौंमा सात आना जग्गा र उनको परिवारका नाममा काठमाडौं र गोरखामा करिब ३० रोपनी जग्गा गरी ७ करोड र अर्का गुन्डा नाइके गिरीको नाममा २ करोड ९४ लाखको अवैध सम्पत्ति रहेको दाबी गरिएको थियो।
आपराधिक गतिविधि गरेर अकुत सम्पत्ति आर्जन गरेको मुद्दामा ‘गुन्डा नाइके’ मनाङेको सम्पत्ति भने विभागले गरेको दाबी अनुसार नभएको ठहर विशेष अदालतले गरेको थियो। विशेषले उनीसँगै श्रीमती पासाङ डोमा गुरुङलाई समेत सफाइ दिएको थियो।
ब्युरो र विभागले मनाङेको नाममा १४ करोडभन्दा बढीको सम्पत्ति देखिएको र त्यसको स्रोत नखुलेको दाबी गर्दै विशेषमा मुद्दा दायर गरेका थिए।
अभियोगपत्रमा मनाङेकी श्रीमतीका नाममा काठमाडौंमा करिब तीन रोपनी जग्गा र घर तथा नुवाकोटमा ७७ रोपनी १३ आना जग्गा रहेको, मनाङेको नाममा गोसाइँकुण्ड क्रसर, ओम मल्टिपर्पोज, इच्छामाई र वेस्ट पोइन्ट ढुंगारोडामा गरी करिब ५० लाख सेयर लगानी रहेको र यी सबै लगानी उनले आपराधिक गतिविधिबाट आर्जन गरेको दाबी गरिएको थियो।
तर, विशेषले यसबारे फैसला सुनाउँदै ‘आरोप दाबी सप्रमाण पुष्टि हुन नसकेकाले प्रतिवादीले आरोप दाबीबाट सफाइ पाउने’ उल्लेख गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
