काठमाडौं– सशस्त्र प्रहरी बलको हलचोकस्थित मुख्यालयभित्र सोमबार मध्यराति आगलागी भएको छ। आगलागी शंकास्पद भएको भन्दै एआइजीको संयोजकत्वमा छानबिन समिति गठन गरिएको छ।
राति साढे १ बजे सशस्त्रको स्टोर भएको भवनमा आगलागी भएको हो। आगलागीमा केही महत्वपूर्ण कागजपत्रहरु समेत जलेका छन्। कुनै गोप्य कागजपत्र जलाउने उद्देश्यले आगलागी भएको आशंकामा सशस्त्र मुख्यालयले प्रशासन विभागका एआइजी प्रेम शाहीको संयोजकत्वमा मंगलबार छानबिन समिति गठन गरेको छ।
‘घटना केही शंकास्पद भएकाले नै छानबिन समिति गठन गरेका हौं,’ सशस्त्र प्रहरी बलका प्रवक्ता डिआइजी बाबुराम पाण्डेले नेपाल लाइभसँग भने,‘कसरी आगो लाग्यो भन्ने खुल्न सकेको छैन।’ सशस्त्र खेलमैदानसँगै रहेको प्याराफिट रहेको भवनमा आगो लागेको हो।
आगलागीबाट अन्दाजी २० लाख रुपैयाँ बराबरको धनमाल क्षति भएको डिआइजी पाण्डेले बताए। १ बजेर करिब ३० मिनेटमा आगलागी भएकोमा दुई वटा दमकलले साढे २ घन्टामा आगो नियन्त्रणमा लिइएको थियो। आगलागी भएको स्थानमा ग्यास सिलिण्डरसमेत थियो।
आगलागी घटनाको स्थानीय प्रहरीले मुचुल्का बनाएको छैन। महानगरीय अपराध महाशाखाबाट एक टोलीलाई अनुसन्धानका लागि बोलाइएको प्रवक्ता पाण्डेले बताए। सशस्त्र प्रहरी बलभित्र विगतमा भएका आर्थिक अनियमितताका लुकाउने उद्देश्यले कसैले नियोजित रुपमा आगजनी गरिएको हुन सक्ने सशस्त्रका कतिपय अधिकारीहरुले आशंका गरेका छन्।
आगलागीमा लेखासम्बन्धी महत्वपूर्ण फाइलहरु जलेका छन्। उक्त कोठामा विद्युत् सर्ट भएर आगो लाग्ने अवस्थासमेत नदेखिएकाले घटना शंकास्पद बनेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
