काठमाडौं- सर्वनाम थिएटरले मोबाइल फिल्म प्रतियोगिता आयोजना गर्ने भएको छ।
राजधानीको कालिकास्थानस्थित थिएटरमा 'दृश्यांश'को दोस्रो संस्करण घोषणा गरिएको हो। 'दृश्यांश'को निर्णायकमा निश्चल बस्नेत, अभिनाश विक्रम शाह, र दिपक रौनियार र सुशील पौडेल निर्णायक रहेका छन्।
प्रतियोगिताबारे जानकारी दिँदै 'दृश्यांश'की संयोजक सम्पदा मल्लले कथा भएर पनि प्रविधिका कारण खुम्चिएका युवा पुस्तालाई यो प्रतियोगिताले मुलधारमा ल्याउन सहयोग गर्ने बताइन्। 'मोबाइल फिल्म प्रतियोगिता' नेपालमा नयाँ सुनिए पनि विश्वमा यस्ता प्रकारका महोत्सव धेरै हुने जानकारी दिँदै उनले पहिलो संस्करणमा करिब ४ सय चलचित्र आएको र उत्साहजनक सहभागिता रहेकाले दोस्रो संस्करण गर्न हौसिएको बताइन्।
निर्देशक निश्चल बस्नेतले कुनैबेला आफूले फिल्म बनाउने सोच्दा प्लेटफर्म नपाएको र धेरै भौंतारिनुपरेको सम्झिए। तितो अनुभव सुनाउँदै उनले यस्ता प्रतियोगिताले फिल्म बनाउन चाहने तर प्रविधिको कारण उजागर हुन नपाएका प्रतिभालाई मूलधारमा ल्याउने विश्वास व्यक्त गरे।
अभिनाश विक्रम शाहले पनि पहिलेको 'दृश्यांश' अनुभव सुनाउँदै त्यो बेला पनि उत्कृष्ट फिल्म आएको बताए।
आफ्नो लागि नयाँ अनुभव भएको बताउँदै अर्का निर्णायक सुशील पौडेलले मोबाइलबाट फिल्म बनाउने प्रतियोगीलाई अवसर र चुनौती दुवै भएको भनाइ राखे।
सहआयोजक सिनेमाघरका सागर खरेलले आफूहरुले नेपाली फिल्मलाई विश्वव्यापीकरण गर्ने अभियानका साथ एप्लिकेसनको सुरुवात गरिएको जानकारी दिए। सर्वनामका निर्देशक अशेष मल्लले कला व्यक्त गर्ने माध्यम मात्र फरकफरक भए पनि कला एउटै हुने र यो प्रयोग नौलो हुने विचार राखे।
मोबाइलको क्वालिटी अनुसार फिल्मको उत्कृष्टता जाँचिने हो कि भन्ने प्रश्नमा निर्देशक बस्नेतले कुन मोबाइलले खिचेको भन्नुभन्दा पनि चलचित्रले भन्न खोजेको कुरा महत्वपूर्ण रहेको बताए।
प्रतियोगिताको मापदण्ड
प्रतियोगितामा भाग लिन चाहनेले मोबाइबाट खिची बनाइएको फिल्म आयोजकलाई बुझाउन सक्नेछन्। फिल्मको अधिकतम समय ३ मिनेट हुनेछ।
प्रतियोगितामा पहिलो हुनेलाई रु ७५ हजार, दोस्रोलाई स्यामसुङ ट्याब ३ भी र तेस्रोलाई टचकन ट्याब दिइनेछ। उत्कृष्ट फिल्महरुलाई सिनेमाघर एपमा राखिनेछ धेरै हेरिएकोलाई अडियन्स च्वाइस अवार्ड आइप्याड ९.७ इन्च प्रदान गरिनेछ।
प्रतियोगीले आउँदो माघ १७ सम्म सर्वनाम थिएटर वा [email protected] मा फिल्म पठाउन सक्ने आयोजकले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749627050.jpg)
-1749627522.jpg)
