काठमाडौं। यमनका हुथी विद्रोहीले साउदी अरबका विमानस्थल र तेल प्रशोधन केन्द्रमा आक्रमण जारी राख्ने चेतावनी दिएका छन्।
मंगलबार राति साउदी अरबको तेल कम्पनी साउदी अरामकोको धहरानस्थित मुख्यालयमा आक्रमण भएको भोलिपल्ट बुधबार हुथीहरूले थप आक्रमण गर्ने घोषणा गरेका हुन्। उक्त आक्रमणबाट मुख्यालयमा ठूलो क्षति पुगेको घटनाबारे जानकार स्रोतहरूले रोयटर्सलाई बताएका छन्।
हुथीहरूले साउदी अरबका विमानस्थल र तेल केन्द्रलाई वैध सैन्य लक्ष्य भन्दै आक्रमणलाई यमनमाथि साउदी सेनाले गरेका हमलाको जवाफी कारबाहीका रूपमा व्याख्या गरेका छन्। खाडी क्षेत्रमा अमेरिका र इरानबीचको टकरावसँगै पुनः चर्किएको द्वन्द्व थप विस्तार हुन सक्ने उनीहरूको चेतावनी छ।
साउदी अरबले पछिल्लो एक सातायता हुथीहरूको बढ्दो आक्रमण सामना गरिरहेको छ। शनिबार राजधानी रियादस्थित किङ खालिद अन्तर्राष्ट्रिय विमानस्थलमा भएको आक्रमणमा १३ जनाको मृत्यु भएको थियो।
अरामकोको मुख्यालयमा आगलागी
मंगलबार राति पूर्वी सहर धहरानस्थित साउदी अरामकोको मुख्यालयमा भएको आक्रमणपछि आगलागी भएको थियो। घटनाबारे जानकारी भएका तीन स्रोतले आगो भवनका विभिन्न तलामा फैलिएको रोयटर्सलाई बताएका छन्। तर‚ साउदी अरबको ऊर्जा मन्त्रालयले आक्रमणबाट सीमित आगलागी मात्र भएको जनाएको थियो।
दुई स्रोतका अनुसार अरामकोको सञ्चालन सामान्य रूपमा जारी थियो र कर्मचारीले घरबाट काम गरिरहेका थिए। यस विषयमा रोयटर्सले प्रतिक्रिया माग्दा कम्पनीले तत्काल जवाफ दिएको थिएन।
हुथीहरूले बुधबार जारी गरेको वक्तव्यमा धहरानस्थित अरामकोका संरचना, रियाद विमानस्थल र रियादस्थित अरामकोको तेल प्रशोधन केन्द्रलाई लक्षित गरी क्षेप्यास्त्र तथा ड्रोन प्रहार गरेको दाबी गरेका छन्।
उनीहरूले अन्तर्राष्ट्रिय जल तथा हवाई यातायात कम्पनी, सर्वसाधारण र कर्मचारीलाई साउदी अरबका विमानस्थल तथा तेल केन्द्रबाट बाहिरिनसमेत आग्रह गरेका छन्।
धहरानस्थित अरामको परिसरमा कम्पनीको प्रमुख सञ्चालन केन्द्र छ। त्यहाँबाट कम्पनीका स्थल तथा समुद्रमा रहेका तेल उत्खनन केन्द्र, पाइपलाइन, प्रशोधन केन्द्र र निर्यात टर्मिनलको विशाल सञ्जालको व्यवस्थापन गरिन्छ।
साउदी नेतृत्वको गठबन्धनले बुधबार हुथीहरूले रियादतर्फ प्रहार गरेको एक ब्यालेस्टिक क्षेप्यास्त्र रोकेको जनाएको छ। सोही दिन साउदी राजधानीमा ठूलो विस्फोटको आवाजसमेत सुनिएको थियो।
एक प्रत्यक्षदर्शीका अनुसार साउदी अधिकारीहरूले बुधबार रियादमा सम्भावित हवाई आक्रमणको चेतावनी जारी गरेका थिए। पछि उक्त चेतावनी हटाइएको थियो। विस्फोटको आवाज के कारणले आएको थियो भन्ने तत्काल स्पष्ट हुन सकेन। साउदी अधिकारीहरूले पनि त्यसबारे तत्काल प्रतिक्रिया दिएका थिएनन्।
शनिबारको आक्रमणसहित रियादको अन्तर्राष्ट्रिय विमानस्थल चारपटक आक्रमणको निशानामा परेको छ। पछिल्लो दशकमा साउदी अरबमा भएको आक्रमणमध्ये शनिबारको घटना सबैभन्दा घातक रहेको विवरणमा उल्लेख छ।
अक्टोबर १७ सम्मका लागि विमानस्थल बन्द गरिएको छ भने विभिन्न वायुसेवा कम्पनीले साउदी अरबका लागि उडान रद्द गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
