काठमाडौं– प्रदेश ३ र ४ को अन्तिम नतिजा आएको भोलिपल्ट थप तीन प्रदेशको पनि अन्तिम नतिजा आएको छ।
प्रदेश ५ मा प्रत्यक्षतर्फ ५२ मध्ये सबैभन्दा बढी २८ सिट जितेको नेकपा एमालेको एकल बहुमत भने नपुग्ने भएको छ। उसले समानुपातिकतर्फ कुल ५ लाख ३३ हजार ६ सय १३ मत पाउँदा १३ सिट पाउने सम्भावना रहन्छ। यसो भएमा प्रदेश ५ मा बहुमत पाउन उसलाई थप ३ सिट आवश्यक पर्छ। प्रदेश ५ मा कुल ८७ सांसदको प्रदेशसभा रहन्छ। बहुमतका लागि ४४ सिट आवश्यक पर्छ।
यद्यपि आयोगले प्रतिनिधिसभा र प्रदेशसभामा दलले पाएको समानुपातिक सांसद संख्या टुंगो लगाइसकेको छैन।
यद्यपि माओवादीको सिट पनि जोड्दा भने दुई तिहाइ पुग्नेछ। प्रत्यक्षतर्फ १४ सिट जितेको माओवादीले समानुपातिकतर्फ ६ सिट पाउने सम्भावना छ। यसो भएमा वाम गठबन्धनको कुल ६१ सिट पुग्नेछ। जुन दुई तिहाइभन्दा बढी हो।
एमालेभन्दा झन्डै ३५ सय कम मत ल्याएको कांग्रेसको भने प्रत्यक्ष र समानुपातिक गरी कुल २० सिट पुग्ने सम्भावना छ। उसले प्रत्यक्षतर्फ केवल ७ सिट जितेको छ।
यो पनि पढ्नुहोस्- प्रदेश ३ र ४ को समानुपातिक मतगणना सकियो, ३ मा एमाले एक्लैलाई बहुमत
त्यस्तै, प्रदेश ६ मा प्रत्यक्षतर्फ १४ सिट जितेको एमालेले समानुपातिकतर्फ ६ सिट पाउने सम्भावना छ। यसो भएमा प्रदेश ६ को कुल सांसद संख्या ४० को बहुमत पुग्नका लागि १ सिट नपुग्ने भएको छ। बहुमतसहित सरकार बनाउन २१ सिट चाहिन्छ। तर, प्रत्यक्षतर्फ ९ सिट जितेको वाम गठबन्धनको अर्को दल माओवादीले समानुपातिकतर्फ प्राप्त गर्ने सम्भावना रहेको ४ सिट पनि जोड्दा उनीहरुको दुई तिहाइ पुग्छ। दुई तिहाइका लागि २७ सिट आवश्यक पर्छ। जबकि उनीहरुसँग ३३ सिट हुनेछ।
प्रत्यक्षतर्फ १ सिट मात्रै जितेको कांग्रेसले समानुपातिकतर्फ कांग्रेसले ५ सिट जित्ने सम्भावना छ।
समानुपातिकतर्फ प्रदेश ७ मा कांग्रेसले सबैभन्दा बढी मत पाए पनि एमालेसँग समान ८ सिट पाउने सम्भावना छ। कांग्रेसले प्रत्यक्षतर्फ केवल ४ सिट जितेको छ। प्रदेश ७ मा प्रदेशसभा ५३ सदस्यीय हुनेछ। सरकार बनाउन २७ सिट आवश्यक पर्छ। १२ सिट पुग्ने सम्भावना रहेको कांग्रेसका लागि सत्ता यात्रा असम्भवप्राय: छ।
एमालेले यो प्रदेशमा प्रत्यक्षतर्फ १७ सिट जितेको छ। समानुपातिकसहित उसको कुल २५ सिट पुग्ने सम्भावना छ। सरकार गठनका लागि उसलाई पनि एकल बहुमत पुग्दैन। तर, समानुपातिकबाट माओवादीले ४ सिट पाउने सम्भावना रहेका कारण वामपन्थी गठबन्धनको ३९ सिट पुग्न सक्छ। यो कुल सांसद संख्याको दुई तिहाइ मत हो। दुई तिहाइका लागि ३६ सिट भए पुग्छ।
प्रदेश १ र २ मा मतगणना जारी छ। प्रदेश ३ र ४ को मतगणना शुक्रबार नै सकिएको छ।
प्रदेश ३ मा एमालेलाई एकल बहुमत प्राप्त भएको छ। उसले कुल प्रदेश ३ मा कुल ११० जनाको प्रदेशसभा हुनेछ। सरकार बनाउन ५६ सिट आवश्यक पर्छ। एमालेको ५८ सिट हुने भएपछि ऊ एक्लैले पनि सरकार गठन गर्न सक्नेछ।
प्रत्यक्षतर्फ १५ सिट जितेको माओवादीले समानुपातिकमा ८ सिट पाउने देखिन्छ। यसअनुसार वाम गठबन्धन कायम रहेमा उनीहरुको मात्रै ८१ सिट पुग्ने देखिन्छ। यो भनेको प्रदेशसभाको दुई तिहाइभन्दा बढी सिट हो।
प्रदेश ४ मा पनि एमाले नै ठूलो दल बनेको छ। कुल ६० सिटको प्रदेशसभा रहेको यो प्रदेशमा एमालेको कुल २७ सिट पुग्ने सम्भावना छ। सरकार बनाउन आवश्यक ३१ सिट भने ऊसँग पनि पुग्दैन।
वाम गठबन्धनको अर्को दल माओवादीले प्रत्यक्षतर्फ ९ सिट जितेको छ भने समानुपातिकतर्फ ३ सिट पाउने सम्भावना छ। यसअनुसार एमाले र माओवादीको कुल ३९ सिट पुग्नेछ। सरकार गठनका लागि यो स्पष्ट बहुमत हो। तर, दुई तिहाइ भने पुग्दैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
