बुटवल- प्रदेशको राजधानी स्थापनाका लागि सरकारले गठन गरेको कार्यदलले रुपन्देहीमा प्रदेश ५ को अस्थायी राजधानी बनाउन पर्याप्त पूर्वाधार रहेको जनाएको छ।
कार्यदलले ५ नम्बर प्रदेशको राजधानी स्थापनाका लागि पूर्वाधार अध्ययन गरेको थियो। अध्ययनपछि प्रदेश प्रमुख र मुख्यमन्त्रीका कार्यालय, मन्त्रालय, सचिवालय, पहिलो बैठक बस्ने स्थानलगायतका सबै पूर्वाधार रुपन्देहीमा पाइएको कार्यदलले बताएको छ।
भौतिक पूर्वाधार अध्ययन गर्न स्थलगत भ्रमणमा रहेका क्षेत्रीय प्रशासन कार्यालय पोखराका सहप्रशासक बाबुराम गौतमले शुक्रबार र शनिबार रुपन्देहीका बुटवल र भैरहवाका विभिन्न सरकारी तथा अर्धसरकारी कार्यालयका भवन अवलोकन गरेका थिए। ती कार्यालयको अवलोकनपछि उनले बुटवलमा भने, 'सरकारले तत्काल रुपन्देहीलाई अस्थायी राजधानी तोकेमा त्यसका लागि प्रयाप्त पूर्वाधार रहेको पाइयो।'
सहप्रशासक गौतमले बुटवलको सीप विकास तालिम केन्द्र, राजश्व अनुसन्धान कार्यालय, यातायात कार्यालय, निर्माणाधीन इलाका प्रशासन, सडक डिभिजन कार्यालय, नापतौल कार्यालय, धेरै वर्षदेखि बन्द रहेको बुटवल धागो कारखाना, शंकरनगर बन वाटिका, बुटवल उद्योग वाणिज्य संघ, रुपन्देही व्यापार संघ, निर्माणाधीन मुख्य न्यायाधीश निवासलगायतका भवन, कार्यालय तथा संरचना रहेकाले राजधानीका लागि पर्याप्त हुने बताए।
राजधानीका लागि पुरानै पूर्वाधारले पुग्ने भएकाले तत्काल कुनै नयाँ संरचना निर्माण गर्नु नपर्ने पनि उनको भनाइ थियो। पूर्वाधार अध्ययनका लागि प्रधानमन्त्री कार्यालयबाट खटिएको टोलीले बुटवल, भैरहवा र दाङमा स्थलगत अध्ययन गरिरहेको छ। सहप्रशासक गौतमका अनुसार टोलीले आइतबारसम्म सरकारलाई प्रतिवेदन बुझाइसक्नेछ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
