काठमाडौं- नेपाललाई हिमालयको प्रवेशद्वार देशका रूपमा स्थापित गर्ने उद्देश्यले सन् २०१७ देखि सुरु भएको हिमालयन ट्राभल मार्टको तेस्रो संस्करण बिहीबार काठमाडौंमा सुरु भएको छ।
मार्ट यही जुन ९ अर्थात् जेठ २६ गतेसम्म काठमाडौंको सोल्टी होटलमा चल्नेछ। मार्टको उद्घाटन प्रधानमन्त्री केपी शर्मा ओलीले गरेका हुन्।
मार्टको उद्घाटन गर्दै प्रधानमन्त्री ओलीले हिमालयन मार्टले नेपाललाई विश्वसामु चिनाउन सहयोग गरेको बताए। मार्टले विश्वसामु हाम्रो गत्तव्यहरुको प्रचार भएको प्रधानमन्त्री ओलीको भनाइ छ।
हिमालयन ट्राभल मार्ट नेपालको इतिहासमा पर्यटन प्रवर्द्धनका लागि भएको सबैभन्दा ठूलो मेला हो। मेलामा ५३ देशका पर्यटन व्यवसायी, टुर अपरेटर, ब्लगर, क्रेता, बिक्रेता र मिडिया गरी दुई सय ५० भन्दा बढी प्रतिनिधिको सहभागिता रहेको छ।
यसमा ७२ जना क्रेता तथा नेपाललगायत हिमालय क्षेत्रका ४५ विक्रेताले सहभागिता जनाएका छन्।
हिमालयन ट्राभल मार्ट पर्यटन प्रवर्द्धनका लागि नेपालमा हुँदै आएको यो सबैभन्दा ठूलो मेला हो। मेलामा ४१ देशका पर्यटन व्यवसायी, टुर अपरेटर, ब्लगर, क्रेता, बिक्रेता र मिडिया गरी ७ सय भन्दा बढी प्रतिनिधिको सहभागिता रहने छ।
संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड र पाटा नेपाल च्याप्टरको आयोजनामा मार्ट सञ्चालन गरिएको हो। मार्टमा युरोप, अमेरिका, भारत, चीनलगायत देशबाट पर्यटन गतिविधिमा सक्रिया टुर अपरेटर, बायर र सेलरको उपस्थिति रहने निश्चित भएको छ।
नेपालमा रहेका पर्यटकीय गन्तव्यको प्रचारप्रसार कसरी गर्ने भने विषयमा विश्वमा चर्चित ब्लगर र मिडियाबीच पनि मार्टमा छलफल हुनेछ।
हिमालय क्षेत्रसँगै नेपालको पर्यटन बजारलाई विश्व बजारमा लैजाने र यहाँका सबै उत्पादन हिमालय क्षेत्रसँग आबद्ध छन् भनेर देखाउन मार्ट आयोजना गरिएको पाटा नेपाल च्याप्टरका अध्यक्ष सुनिल शाक्यले बताए।
मार्टमार्फत हिमालयन पर्यटन विकास, इनोभेसन र मार्के्टिङ क्षेत्रको विस्तारका लागिसमेत सहयोग पुग्ने उनकोभनाइ छ। यसले बायरलाई नेपालमा व्यापार सुरु गर्न प्रोत्साहन मिल्नुको साथै नेपालका गन्तव्यको व्यापार गरिरहेका कम्पनीलाई सर्भिस किन्न आग्रह समेत हुने भएको छ।
पर्यटन बोर्डका कार्यकारी निर्देशक दीपकराज जोशीले मेलामा उपस्थित मिडिया, ब्लगरले दिएको सही सूचना पछ्याउँदै नेपालमा पर्यटकको आगमन बढ्ने बताए । मार्टले जुटाएको अवसरको फाइदा पर्यटन क्षेत्रका लागि फलदायी हुने र यसले नेपाललाई विश्वमाझ चिनाउन सहयोग पुर्याउने उनको भनाइ थियो।
साथै जोशीले नेपाललाई हिमालय क्षेत्रको मुख्य प्रवेश मार्गका रुपमा स्थापित गराउनु मेलाको मुख्य उद्देश्य रहेको बताएका छन्।
‘विश्वचर्चित ब्लगर्स, बायर्स र मिडियालाई जमघट गराई नेपाल प्रवर्द्धन गर्नुसमेत यसको उद्देश्य हो,’ उनले भने, ‘अन्तरदेशीय व्यावसायिक जमघटले व्यवसाय विस्तारका लागि सहज बनाउने छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
