काठमाडौँ- सरकारले आगामी आर्थिक वर्षका लागि साढे ८ प्रतिशतको आर्थिक वृद्धिदरको लक्ष्य राखेको छ। उक्त महत्वाकांक्षी आर्थिक वृद्धिदर हासिल गर्नका लागि वित्तीय संघीयता कार्यान्वयन सबैभन्दा ठूलो आधारका रुपमा लिएको अर्थमन्त्री डा. युवराज खतिवडाले बताएका छन्।
संसद्मा बोल्दै अर्थमन्त्री खतिवडाले आर्थिक वृद्धिदर महत्वाकांक्षी देखिएपनि त्यसको प्राप्तीका लागि आफुले तयार पारेको आधारसमेत खुलाएका छन्।
‘आर्थिक वृद्धिदर साढे ८ प्रतिशत सम्भव छैन कि भनेर हामीलाई शंका लाग्नु स्वभाविकै हो। किनभने अहिलेसम्म हामीले त्यो उपलब्धी हासिल गरेकै छैनौँ। तर अहिले त्यसका लागि हामीले आधार सिर्जना गरेका छौं,' अर्थमन्त्री खतिवडाले भने, 'आधार भनेर हामीले औद्योगिक आधारको ठूलो कुरा मैले गरिरहेको छैन। मैले भौतिक पूर्वाधारको आधारलाई बढी जोड गरेको छु। तर वित्तीय संघियता कार्यान्वयनको आधारलाई आर्थिक वृद्धिको सबैभन्दा ठूलो जग मानिरहेका छौं।’
तीन तहले गर्ने बजेट खर्च र त्यसबाट बढ्ने आर्थिक क्रियाकलापका कारण पनि आर्थिक वृद्धिदर लक्ष्यअनुरुप नै रहने उनको भनाई छ।
‘संघको, प्रदेशको र स्थानीय तहको बजेट जोड्दाखेरी साढे १७ खर्बको बजेट खर्च हुन्छ, सार्वजनिक खर्चका रुपमा। त्यो खर्चले सिर्जना हुने आर्थिक क्रियाकलाप र ती क्रियाकलापबाट हुने आर्थिक वृद्धिले त्यो सम्भव छ,’ अर्थमन्त्री खतिवडाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
