काठमाडौं– बुधबार राति दरबारमार्गको डेजा भू डिस्कोमा भएको तोडफोड घटनाको अनुसन्धानको क्रममा पक्राउ परेका क्रिकेटर पृथु बास्कोटासहित ७ जनालाई प्रहरीले ठगी मुद्दामा कारबाही अघि बढाएको छ। उनीहरुलाई थुनामा राखेर अनुसन्धान गर्न जिल्ला अदालत काठमाडौंले आदेश दिएको महानगरीय प्रहरी परिसर काठमाडौंले जनाएको छ।
डिजे मार्समेलोलाई ल्याउने भन्दै टिकट बेचेर उनलाई नल्याएको विवादमा क्लबमा तोडफोड भएको थियो। आफुहरुलाई क्लब र कार्यक्रम आयोजकले ठगी गरेको भन्दै टिकट किनेका सर्वसाधरणले उजुरी गरेपछि उनीहरुलाई पक्राउ गरिएको प्रहरीले जनाएको छ । शुक्रबार पक्राउ परेकाहरुलाई थुनामा राख्न अदालतबाट म्याद लिइएको काठमाडौं परिसरका एसपी रामदत्त जोशीले बताए ।
क्रिकेटर बास्कोटा डेजा भूका लगानीकर्तामध्ये एक भएकाले उनलाई पक्राउ गरिएको महानगरीय अपराध महाशाखाका एसएसपी दिवेश लोहनीले बताए ।
नेपाली यू–१९ टिमका पूर्व कप्तान बाँस्कोटाले सिनियर टिमबाट समेत केही वर्ष खेलेका थिए । घरेलु क्रिकेट खेलिरहेका उनी एभरेस्ट प्रिमियर लिग (इपिएल) टिम चितवन टाइगर्सका कप्तान हुन्। इपिएल पुसको पहिलो सातादेखि काठमाडौंमा सुरु हुँदैछ। ठगी मुद्दा अघि बढेपछि अब उनी चार सातासम्म प्रहरी हिरासतमा बस्ने सम्भावना छ । जसकारण उक्त घटनाबाट चितवन टाइगर्स क्लब समेत समस्यामा परेको छ । ठगी मुद्दामा प्रहरीले २४ दिनसम्म हिरासतमा राखेर अनुसन्धान गर्न पाउँछ ।
प्रहरीले क्लबका संचालकहरु जयन श्रेष्ठ, मयंक खड्का, विशाल डाँगी, मिलन श्रेष्ठ तथा कार्यक्रम आयोजक रितेश मारवाडी र राजेश महर्जनलाई ठगी मुद्दामा कारबाही अघि बढाएको हो । १५ सय मानिस अट्ने क्लबमा ६ हजारको टिकट बेचिएको र सम्बन्धित डिजेलाई पनि नल्याएको उनीहरुलाई ठगी मुद्दामा कारबाही अघि बढाइएको एसएसपी लोहनी बताउँछन् ।
अमेरिकन डिजे मार्समेलो ल्याउने भन्दै २५ सय र ३५ सय दरका ६ हजारभन्दा धेरै टिकट बेचिएको थियो। जसअनुसार करिब एक करोड ८० लाख ठगी गरिएको प्रहरीले जनाएको छ। क्लबमा पुगेकाहरुले १ बजेसम्म पनि डिजे मार्समेलोलाई कुर्दा नआएपछि तोडफोड सुरु गरेका थिए। क्लबमा करिब ५ करोड मूल्य बराबरको क्षति भएको छ। मार्समेलोले भने आफू बिरामी भएकाले आउन नपाएको सामाजिक सञ्जाल मार्फत जानकारी गराउँदै माफी मागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
