काठमाडौं– प्रदेशसभाका लागि भएको निर्वाचनको समानुपातिकतर्फ पनि अन्तिम मत आउन थालेको छ। केही प्रदेशको समानुपातिक मतगणना सकिएको छ।
प्रदेश ३ मा एमाले एक्लैले स्पष्ट बहुमत पाएको छ। प्रत्यक्षतर्फ ६६ मध्ये ४२ सिट जितेको एमालेले समानुपातिक तर्फबाट झन्डै १६ सिट पाउने सम्भावना देखिन्छ।
यद्यपि निर्वाचन आयोगले समानुपातिक तर्फबाट अन्तिम मत गणना सकिएका प्रदेशमा पनि दललाई सिट संख्या वितरण गरिसकेको छैन।
प्रदेश ३ मा कुल ११० जनाको प्रदेशसभा हुनेछ। सरकार बनाउनका लागि ५६ सिट आवश्यक पर्छ। एमालेको ५८ सिट हुने भएपछि ऊ एक्लैले पनि सरकार गठन गर्न सक्नेछ।
प्रत्यक्षतर्फ १५ सिट जितेको माओवादीले समानुपातिकमा ८ सिट पाउने देखिन्छ। यसअनुसार वाम गठबन्धन कायम रहेमा उनीहरुको मात्रै ८१ सिट पुग्ने देखिन्छ। यो भनेको प्रदेशसभाको दुई तिहाइभन्दा बढी सिट हो।
प्रत्यक्ष तर्फ ७ सिट जितेको कांग्रेसले समानुपातिकतर्फ भने १४ सिट पाउने सम्भावना छ।
कुल ६० सिटको प्रदेशसभा रहेको प्रदेश ४ मा एमाले सबैभन्दा ठूलो दल बन्ने भएको छ। प्रत्यक्षतर्फको ३६ मध्ये १७ सिट जितेको एमालेले समानुपातिक तर्फबाट भने १० सिट पाउने सम्भावना छ। यसो भएमा एमालेको कुल २७ सिट पुग्नेछ। सरकार बनाउनका लागि आवश्यक ३१ सिट भने ऊसँग पनि पुग्दैन।
वाम गठबन्धनको अर्को दल माओवादीले प्रत्यक्षतर्फ ९ सिट जितेको छ भने समानुपातिक तर्फबाट ३ सिट पाउने सम्भावना छ। यसअनुसार एमाले र माओवादीको कुल ३९ सिट पुग्नेछ। सरकार गठनका लागि यो स्पष्ट बहुमत हो।
प्रदेश ४ मा कांग्रेसको प्रत्यक्षतर्फ ६ सिट छ भने समानुपातिकबाट उसलाई ९ सिट आउने सम्भावना छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
