काठमाडौं– चार साताअघि ललितपुरमा सामूहिक बलात्कार र हत्या प्रयासको घटनामा संलग्न अभियुक्तहरु पीडित युवतीकै श्रीमानका साथीहरु भएको खुलेको छ। पक्राउ परेका रघु सिलवाल, बिशालध्वज कार्की र पवन कुँवर पीडित युवतीकै श्रीमानका साथीहरु भएको प्रहरीले जनाएको छ।
पक्राउ परेका तीनै जनालाई शुक्रबार महानगरीय प्रहरी परिसर ललितपुरले जबर्जस्तीकरणी र ज्यान मार्ने उद्योग मुद्दामा कारबाही अघि बढाएको छ। शुक्रबार उनीहरुलाई अदालतमा पेश गरी मुद्दा प्रक्रिया अघि बढाइएको ललितपुर परिसरका प्रवक्ता डिएसपी नरेन्द्र चन्दले बताए।
अफिसबाट घर फर्कंदै गर्दा गत मंसिर २ गते ललितपुरमा युवतीको सामूहिक बलात्कारको प्रयास गर्दा प्रतिकार भएपछि हत्या प्रयास भएको थियो। गोदावरी नगरपालिकाको बाँडेगाउँमा २१ वर्षीय युवतीको उनीहरुले नै हत्या प्रयास गरेको प्रहरीले जनाएको छ। पीडित पक्षले बलात्कार नै भएको भन्दै जाहेरी दिएको डिएसपी चन्दले बताए।
साँझ करिब पौन ७ बजेको समयमा बाँडेगाउँको बस स्टेसनमा बसबाट झरेर घर फर्कंदै गर्दा बाटोमा रहेका केही युवाले उनलाई सडकबाट धकेलेर झाँडीमा पुर्याए। उनले हारगुहार गरिन्। कराउन थालेपछि मुख थुनेर बलात्कार प्रयास गरे। त्यसपछि पनि प्रतिकार गर्दा ढुंगाले टाउकोमा हानेको उनले बताएकी छिन्। पक्राउ परेका युवकहरुले नै आफूलाई सुरुमा बलात्कार प्रयास गरेको र पछि हत्या गर्न खोजेको पीडित युवतीले सनाखत गरेकी थिइन्। पक्राउ परेकाहरुले मदिरा र लागूऔषध सेवन गरेका थिए।
बेलुका घर नआएपछि परिवारले युवतीको खोजी सुरु गरेको थियो। फोन पनि नलागेपछि प्रहरीलाई समेत जानकारी गराएर खोजी सुरु गरेका थिए। खोज्ने क्रममा भोलिपल्ट बिहान सडकमुनि उनलाई बेहोस अवस्थामा भेटिएको थियो। कपडा च्यातिएको थियो, उनी अर्धनग्न अवस्थामा थिइन्। शरीरभरि चोट थिए। एक हप्तासम्म उनी बर्बाराउन मात्र सकिन्। एक हप्तापछि मात्र उनको पूर्ण रुपमा होस खुलेको थियो। अहिलेसम्म युवती अस्पतालमै छिन्। महानगरीय अपराध महाशाखाले करिब ४ साता लगाएर घटनाको वास्तविकता पत्ता लगाएको हो। युवती सुन्दर भएकाले मोहित भएर उनीहरुले मदिराको नशामा बलात्कार गरेको प्रहरी आशंका छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
