प्रधानमन्त्री ओली भन्छन्- मेरो देश मै बनाउँछु भन्ने अठोट नलिएकाले देश बनेन

नेपाल लाइभ | २०७६ जेठ २२ बुधबार | Wednesday, June 05, 2019 २०:२७:०० मा प्रकाशित

फाइल तस्बिर


काठमाडौं- प्रधानमन्त्री केपी शर्मा ओलीले युवाहरुमा देश बनाउने भावना र अठोट नभएसम्म देश नबन्ने बताएका छन्।

काठमाडौं महानगरपालिकाले बुधबार राजधानीमा गरेको स्मार्ट सहरी प्रविधि प्रतिस्पर्धा कार्यक्रमलाई सम्बोधन गर्दै प्रधानमन्त्री ओलीले आफ्नो देश आफैँले बनाउनुपर्नेमा जोड दिए। 

२०७२ साल फागुन ४ गते भत्किएको धरहराको फेदमा गएर मै बनाउँछु मेरो धरहरा भनेको स्मरण गर्दै उनले भने, 'मेरो देश मै बनाउँछु भन्ने अठोट नलिएका कारण अहिलेसम्म देश नबनेको हो।'

प्रधानमन्त्री ओलीले काठमाडौँबासीले काठमाडौँ म बनाउँछु भन्ने बुझेर व्यवहारमा कार्यान्वयन गरे राजधानी बन्ने विश्वास व्यक्त गरे।

महानगरले आयोजना गरेको स्मार्ट सहरी प्रविधि प्रतिस्पर्धामा सहभागी भएका युवाहरुलाई बधाई तथा शुभकामना दिँदै प्रधानमन्त्री ओलीले हिम्मत र अठोट भए काम र अवसरका लागि विदेश जानु नपर्ने उल्लेख गरे। नेपालमा प्रशस्त संभावना भएकाले हिम्मत, इच्छाशक्ति र नविन सोचका साथ देश बनाउने अभियानमा लाग्न उनले सुझाव दिए।