राजविराज– भन्सार छलका सामान आयात–निर्यातमा अवरोध हुन थालेपछि सप्तरीका व्यापारी र व्यवसायी आक्रोशित बनेका छन्।
मंगलबार राजविराजमा एक कार्यक्रमको आयोजना गरी उनीहरूले प्रहरी/प्रशासनलाई र्याखर्याख्ती पारेका छन्।
सामान खरिद गरेको बिल तथा भन्सार तिरेको रसिद समेत लुकाएर सामान एक ठाउँको तर अर्कै ठाउँमा मुचुल्का तयार गरी प्रहरीले नियतबस व्यापारीलाई दुःख दिइरहेको उनीहरूको आरोप छ।
सप्तरी हुँदै अनाधिकृत रुपमा भारत निकासी हुने सुपाडी, कालो मरिच, मदिरा, मटर, गाई–गोरु, स्याउ लगायतका विषयलाई केन्द्रमा राखेर प्रस्तुत भएका व्यापारी/व्यवसायीले प्रहरी प्रशासनले सप्तरीमा आतंक श्रृजना गरेको आरोप लगाए।
सप्तरी उद्योग वाणिज्य संघले आयोजना गरेको ‘व्यावसायिक समस्यामाथि बृहत अन्तर्क्रिया’मा उद्योग, व्यापार तथा सुरक्षासँग सम्बन्धित सम्पूर्ण निकायलाई बोलाइएको थियो। राजनीतिक दलका केन्द्रदेखि जिल्ला तहका नेतासमेत उपस्थित रहेको कार्यक्रममा इटहरीस्थित राजस्व अनुसन्धान कार्यालय, जिल्ला प्रहरी कार्यालय सप्तरी र सशस्त्र प्रहरीको व्यापाक आलोचना भयोे।
‘प्रहरी र राजस्व अनुसन्धान कार्यालयको मिलेमतोमा अहिले पनि ३ वटा गाडी र मान्छे महिनांै दिनदेखि नियन्त्रणमा छन्,’ व्यापारी प्रतिनिधि भुवनेश्वर यादवले भने, ‘यो आतंक बन्द हुनुपर्यो।’
उनले केही दिनअघि भारदह र छिन्नमस्ताबाट पक्राउ परेको कालो मरिच तथा हुनमाननगरबाट पक्राउ गरिएको कपडालाई केन्द्रमा राखेर प्रहरीको आलोचना गरेका हुन्।
तर, राजनीतिक दलका नेता तथा सुरक्षा निकायका प्रमुख समेतले व्यापारीहरूबाट भइरहेका कमजोरी औंल्याउँदै तस्करीलाई कुनै पनि हालतमा छुट दिन नसकिने बताएपछि व्यापारीहरू शान्त भए।
‘सप्तरीको गोबरगाडा, जहाँ ३ सय मान्छेको जनसंख्या छ, त्यहाँ ट्रकका ट्रक मदिरा किन जान्छ?’ नेकपाका केन्द्रीय सदस्य अशोककुमार मण्डलले भने, ‘यो सबै कोशीको बाटो नाउबाट पारी सप्लाइ हुन्छ।’
उनले मदिरा तस्करीमा स्थानीय प्रहरीको समेत मिलेमतो रहेको बताउँदै त्यसलाई रोक्नुपर्ने बताए।
सप्तरीका सिडिओ सुरेन्द्र पौडेलले सप्तरी हुँदै भारत तस्करी हुने गरेको सुपाडी, कालो मरिच, मदिरा, मटर, गाई/गोरु, स्याउ लगायतका वस्तुमा कुनै सम्झौता नगरिने जिकिर गरे।
सप्तरीमा १ हजार २ सय भन्दा बढी मदिराका व्यापारी रहेको र खपतै नहुने क्षेत्रमा ट्रकका ट्रक मदिरा पुगेपछि नियन्त्रणमा लिनु परेको उनले स्पष्ट पारे। छिन्नमस्ता गाउँपालिकाको एउटा वडामा मात्रै ३ सयभन्दा बढी मदिरा व्यापारी रहेको उल्लेख गर्दै उनले भने, ‘सप्तरी जिल्लामै खपत नहुने मदिरा एउटा गाउँमा भित्रिएपछि प्रहरीले त्यसको निगरानी गर्ने कि नगर्ने?’
प्रहरी प्रशासनले खपत नहुने मदिरा, स्याउ र मरिच लगायतका सामान शंकास्पद क्षेत्रमा प्रवेश गरेपछि निगरानी गर्ने र भारत निकासी हुने पक्का भएपछि नियन्त्रणमा लिने गरेको उनले स्पष्ट पारे। ‘हामी कसैलाई दुःख दिन चाहान्नौं, तस्करी हुने बाहेकका सामान खरिद बिक्रीमा कुनै समस्या भए अहिले नै बसेर समाधान निकालौं,’ उनले भने, ‘तर, जुन सामान अशुद्ध मनले देशलाई नै आघात गर्ने गरी आयात निर्यात हुन्छ, त्यस्ता वस्तुमा छुट दिन सकिँदैन।’
भारतीय बजारले सप्तरीका बजार सुनसान भएको गुनासो
व्यापारीले सीमा क्षेत्रमा चोरी निकासी बढेकाले सदरमुकाम राजविराजसहित सप्तरीका बजार सुनसान भएको र आफूहरू विस्थापित हुने अवस्था आएको गुनासो गरे।
घरायसी प्रयोजन, विवाह, व्रतबन्ध तथा चार्डवाडका नाममा छुट दिँदै जाँदा अधिकांश नेपाली सामान खरिद गर्न भारतीय बजार पुग्ने गरेको कपडा व्यवसायी थानसिंह भन्सालीको गुनासो छ। भन्सार कार्यालय र प्रहरीको कमजोरीका कारण खुल्ला सिमानाको फाइदा उठाएर चोरी तस्करी मौलाएको पनि उनले आरोप लगाए।
भारतीय बजारमा खरिद भएका वस्तु गुणस्तरहीन र तौलमा पनि कमी हुने गरेपनि १÷२ रुपैयाँ सस्तो पाइने लोभमा सर्वसाधारण भारतीय बजार कुनौली पुग्ने गरेकाले त्यसलाई नियन्त्रण गर्न प्रहरी प्रशासनले सहयोग गर्नुपर्ने उद्योग वाणज्य संघका अध्यक्ष अरुण प्रधानले आग्रह गरे।
व्यापारी व्यवसायीको गुनासोपछि सिडिओ पौडेल, जिल्ला प्रहरी कार्यालय सप्तरीका एसपी मनोजकुमार सिंह र सशस्त्र प्रहरी बल सीमा सुरक्षा कार्यालयका एसपी खेमवहादुर थापा मगरले सिमानामा निगरानी बढाउने र चोरी निकासी नियन्त्रण गर्ने प्रतिबद्धता व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
