काठमाडौं– नेपाली पोलिसी इस्टिच्युट (एनपिआई) र राष्ट्रिय योजना आयोगबीच विगतमा इस्टिच्युटले पेस गरेका नीतिगत सुझाव र संयुक्त कार्यक्रमका प्रगतिबारे फलोअप बैठक सम्पन्न भएको छ।
एनपीआईले गैरआवासीय नेपाली संघ थाइल्याण्डसँगको सहकार्य र नेपाल एम्बेसीको समन्वयमा बैंककमा कार्यक्रम आयोजना गरेको थियो।
कार्यक्रमको पहिलो सत्रमा आयोगको तर्फबाट उपसचिव नारायण पौडेल र सहसचिव तोया नारायण ज्ञवालीले र एनपिआईको तर्फबाट अध्यक्ष खगेन्द्र ढकालले प्रस्तुति गरेका थिए भने दोश्रो अन्तरक्रिया सत्र एनपिआईका अनुसन्धान संयोजक विश्व तिवारीले सहजीकरण गरेका थिए।
कार्यक्रममा बोल्दै आयोगका सदस्य साहीले विगतका एनपिआईले आयोग समक्ष प्रस्तुत सुझावहरूलाई नेपाल सरकारले गम्भीर रुपमा लिएको र अधिकांश सुझावहरू सरकारको नीतिमा समेटिएको बताए।
हाल नसमेटिएका केही सुझावहरू भविष्यमा पनि समेटिँदै लान सकिने उनले बताए।
१५औं पञ्चवर्षीय योजना र २५ वर्षे दीर्घकालीन लक्ष्य तय गर्ने क्रममा एनपिआईले गरेको विश्वव्यापी सुझाव संकलन र संयोजित सुझावलाई नेपाल सरकारले उच्च महत्व दिई प्रधानमन्त्रीको अध्यक्ष्यतामा भएको राष्ट्रिय विकास परिषद् बैठकमा एनपिआई प्रतिनिधि सहभागी गराई विचार राख्नेसम्म अवसर प्रधान गरिएको साहीले बताए।
सो अवसरमा एनपिआई अध्यक्ष ढकालले नेपालमा प्रत्यक्ष विदेशी लगानी, गरिबी निवारण, वातावरण संरक्षण, मानवीय पुँजी विकास र आर्थिक कूटनीतिको बारेमा विगतका सुझावहरूलाई स्मरण गराउँदै सुझाव सहितको प्रस्तुतीकरण गरेका थिए।
कार्यक्रममा बोल्दै आयोगका उपसचिव पौडेलले आयोग र एनपिआईबीच आठ महिनाअघि सुरु भएको निरन्तरको सम्पर्क र सहकार्य सही दिशातिर अगाडि बढी राखेको भन्दै आफूले नेपाल सरकारका विभिन्न संयन्त्रसँग समन्वय गरेको बताए।
प्रस्तुतिपछिको अन्तरक्रियामा विभिन्न विषयका २१ जना विज्ञ र एनआरएनहरूले प्रश्न र सुझाव पेस गरेका थिए।
छलफलमा भ्रष्टाचार नियन्त्रण, सुशासन शैक्षिक गुणस्तर, पर्यटन, विदेशी लगानी, नागरिकता जस्ता बिषय उठेका थिए।
विनोद चापागाईं र दीपेन्द्र केसीले छलफलको निचोडलाई एक हप्ताभित्र प्रतिवेदन तयार गरी एनपिआईलाई बुझाउने जनाएका छन्।
उक्त प्रतिवेदन एनपिआईले आयोगलाई पेस गर्ने जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
