बर्दिबास- महोत्तरीको बर्दिवास नगरपालिका-२ स्थित जनता माध्यमिक विद्यालयको जग्गा अतिक्रमणमा परेको छ। विक्रम सम्वत् २०१६ सालमा स्थापित यस विद्यालयको १० बिघाभन्दा बढी जग्गा अतिक्रमण भएको विद्यालय प्रशासन र विद्यालय व्यवस्थापन समितिले जानकारी दिएको हो।
विद्यालयका नाममा रहेको जम्मा २० बिघा ५ कठ्ठा १२ धुर जग्गामध्ये १० बिघा जग्गा अतिक्रमणमा छ। बर्दिवास नगरपालिका–१ को गाल्टारस्थित साढे ७ बिघा जग्गामा जबर्जस्ती अतिक्रमण गरी तामाङ टोल बसाइएको शनिबार विद्यालयले नै आयोजन गरेको पत्रकार सम्मेलनमा विद्यालय व्यवस्थापन समितिका अध्यक्ष देवनारायण महतोले बताए।
त्यसैगरी, बर्दिवास–१४ स्थित हटियामा विद्यालयको जग्गामा बनेको पक्कीघर, अर्धपक्की घर र टहरा बनाएर जग्गा हडपिएको छ। हटियास्थित विद्यालयको जग्गामा १० वटा पक्की तीन तलासम्मका घर, १२३ वटा अर्धपक्की भुँइतले घर र ७२ वटा टहरा बनाएर जबर्जस्ती बस्दै आएका महतोले बताए।
बर्दिवासमा बढ्दो शहरीकरणसँगै जग्गाको मूल्य आकासिँदै गएसँगै विद्यालयको जग्गा पनि अतिक्रमण गर्ने क्रम बढेको व्यवस्थापन समिति र विद्यालय प्रशासनले जनाएको छ।
भिडियो
विद्यालयले कैयौंपटक जग्गा खाली गरिदिन आग्रह गरेपनि जग्गा हडपेर मनपरी संरचना बनाएर बसेकाहरुले सुनुवाई नगरेको विद्यालयका प्रधानाध्यापक दिलिप तिवारी बताउँछन्।
विद्यालयको अतिक्रमित जग्गाका मूल्य अहिले अर्बौँको मुल्याङ्कनमा पुगेको तिवारीको भनाइ छ। पछिल्लोपटक विद्यालयले अब विद्यालय व्यवस्थापन समितिको बैठकले विद्यालयको कानुनी स्वामित्व रहेका जग्गा खाली गर्न ३५ दिने सूचना जारी गरेको छ।
यस अवधिमा जग्गा खाली नगरिए स्थानीय प्रहरी/प्रशासन र स्थानीय तहको समन्वयमा जबर्जस्ती बनाइएका संरचना भत्काउने तयारी गरिएको प्रधानाध्यापक तिवारीले बताएका छन्। २०१६ सालमा बर्दिवासका शिक्षाप्रेमी स्वर्गीय निरबहादुर हमालले आफ्नै जग्गा विद्यालयका नाममा दिएर स्थापना गरेका विद्यालयमा कालान्तरमा अन्य दाता थपिँदै जाँदा विद्यालयसँग २० बिघा ५ कठ्ठा १२ धुर जग्गाको कानुनी स्वामित्व भएको छ।
तर, विद्यालयकै जग्गा हडपिँदै जाने क्रमले जग्गाको आम्दानी विद्यालयलाई प्राप्त नहुँदा भौतिक साधन जुटाउन सकस परेको विद्यालय प्रशासनले जनाएको छ। खासगरी समाजका अति विपन्न परिवार, गरिब मुसहर जाति र अन्य दलित जातिका छोराछोरी अध्ययन गर्ने विद्यालयमा कक्षा बालबिकासदेखि १२ सम्मको पठनपाठन हुँदै आएको छ। विद्यालयमा अहिले एकहजार २ सय छात्रछात्रा रहेका विद्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
