प्रतीकात्मक तस्बिर
धनगढी- मानव बेचविखनको घटनामा वृद्धि भइरहेको पाइएको छ। माइती नेपालको धनगढी कार्यालयले दिएको तथ्यांक अनुसार महिला तथा बालबालिका बेचबिखनका घटना वृद्धि भएको पाइएको हो।
चालु आर्थिक वर्ष ०७५/७६ मा सिमानाबाट ९७ महिला र ३८ बालबालिका गरि एक सय ३५ जनाको उद्धार गरिएको माइती नेपालको तथ्यांक छ। यस्तै, भारतबाट एक बालबालिकाको उद्धार गरिएको जनाइएको छ।
आर्थिक वर्ष २०७४/०७५ मा नेपाल भारतको सिमानाबाट ८७ महिला र ३२ बालबालिका गरी एक सय १९ जनाको उद्धार गरिएको थियो भने भारतका विभिन्न स्थानबाट ५ महिला र ४ बालबालिका गरी १२ जनाको उद्धार गरिएको थियो।
चालु आर्थिक वर्षमा ३ जना विरुद्ध मानव बेचविखन तथा ओसारपसारमा मुद्दा दर्ता गरिएको छ भने गत आर्थिक वर्ष ०७४/७५ मा २ जनाविरुद्ध माइती नेपालद्धारा मुद्दा दर्ता गरिएको जनाइएको छ।
कैलाली जिल्ला प्रहरी कार्यालय कैलालीका अनुसार आर्थिक वर्ष ०७५/७६ को हालसम्म मानव बेचबिखन तथा ओसारपसारमा १६ मुद्दा दर्ता भएका छन्। भने आर्थिक वर्ष ०७४/७५ मा ९ वटा मुद्दा दर्ता भएको जनाइएको छ।
नेपाल प्रहरीको तथ्याङक अनुसार आर्थिक वर्ष २०७४/०७५ मा देशभरमा ५ सय ४६ जनाविरुद्ध मुद्दा दर्ता भएको जनाइएको छ।
आर्थिक वर्ष २०६८/०६९ देखि २०७४/०७५ सम्ममा देशभर मानव बेचविखन विरुद्ध मुद्दा दर्ताको संख्या बढ्दै गएको तथ्यांकले देखाएको छ। २०६८/०६९ सालमा १ सय ४३, २०६९/७० सालमा एक सय ६१, २०७०/७१ सालमा दुई सय ९६, २०७१/७२ सालमा दुई सय ८०, २०७२/७३ मा तीन सय ५२, २०७३/७४ मा तीन सय ११ र २०७४/७५ मा ५ सय ४६ मुद्दा दर्ता भएको जनाइएको छ।
माइती नेपालका कार्यक्रम संयोजक शिवचरण चौधरीले सबैभन्दा बढी महिला बेचबिखन पर्ने गरेको बताए। उनका अनुसार महिला ७० प्रतिशत बेचबिखन हुने गरेका छन्। बालबालिका हिस्सा भने ५० प्रतिशत रहेको छ। उनले बेचविखनमा परेको धेरै यौन शोषणमा रहेको बताए। ७ देखि २४ वर्षका महिला तथा बालबालिका बेचबिखनमा पर्ने गरेका छन्।
यौन शोषण, श्रमशोषण, सर्कस, कलकारखाना, मसाज सेन्टर, लागु औषध ओसारपसार, घरेलु कामदार, होटल रेष्टुरेन्ट, शारिरीक अंग बेचविखन तथा प्रत्यारोपण, डान्सबार लगायतमा बेचविखनमा परेका महिला तथा बालबालिकाको प्रयोग हुने गरेको छ।
माईती नेपाल गाउँसम्म पुग्नुपर्छ : उपप्रमुख भट्ट
धनगढी उपमहानगरपालिकाकी उपप्रमुख शुशिला मिश्र भट्टले माइती नेपाललाई धनगढी केन्द्रित नहुन आग्रह गरेकी छिन्।
‘कैलाली जिल्ला ठुलो छ। खुल्ला नाका धेरै छन्। विभिन्न नाकाहरुबाट तस्करहरुले मानव ओसार पसार गरिरहेका छन्,’ माइती नेपाल धनगढीले आयोजना गरेको सरोकारवालाहरुसंगको एक दिने अन्र्तक्रिया कार्यक्रमलाई सम्बोधन गर्दै उपप्रमुख शुशिलाले भनिन्, ‘माईती नेपालले धनगढीको त्रिनगर नाकामा मात्र चेकजाँच गर्नु हुँदैन । हरेक ठाउँमा यसलाई विस्तार गर्न आवश्यक छ।’ उनले माइती नेपालले प्रत्येक पालिकासंग सहकार्य गरेर जनचेतनामूलक कार्यक्रम पनि सञ्चालन गर्न सुझाव दिइन्।
नेपाल बार एशोसियसन धनगढीका अध्यक्ष शिव बहादुर केसीले बेचविखनका मुद्दामा पीडितले न्याय पाउने सम्भावना न्यून रहेको बताए। ‘बेचबिखनसम्बन्धी अदालतमा पुगेका मुद्दाहरुमा प्रमाण कमजोर हुने भएकाले पीडितभन्दा पीडकले सफाई पाउने गरेका छन्,’ उनले भने। उनले कतिपय बेचविखनका मुद्दाहरु पुरुषलाई फसाउने गरि आउने गरेको बताए।
सिविन नेपालका हरिलाल चौधरीले मानव बेचबिखन नियन्त्रण गर्न टोलफ्री नम्बर र सचेतना कार्यक्रम आवश्यक रहेको सुझाव दिए।
धनगढी साझा सम्वाद समितिका अध्यक्ष चेतमान साउदले माइती नेपालले कैलालीका सबै नाकामा चेकपोष्ट राख्न सुझाव दिए।
कार्यक्रममा नेपाल प्रहरी, शशस्त्र प्रहरी, महिला तथा बालबालिका क्षेत्रमा काम गर्ने संघ/संस्थाका प्रतिनिधी, सञ्चारकर्मीको सहभागिता रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
