कञ्चनपुर- कञ्चनपुर निर्वाचन क्षेत्र नं १ बाट प्रतिनिधिसभा सदस्य निर्वाचनमा वाम गठबन्धनका तर्फबाट माओवादी केन्द्रकी विजयी उम्मेदवार बिना मगर प्रदेश नं ७ बाट प्रतिनिधिसभामा प्रतिनिधित्व गर्ने एक्ली महिला बनेकी छिन्।
कैलाली निर्वाचन क्षेत्र नं ५ बाट प्रतिस्पर्धामा रहेकी आरजु राणा देउवा र कैलालीकै निर्वाचन क्षेत्र नं १ बाट प्रतिस्पर्धामा रहेकी वाम गठबन्धनकी उम्मेदवार गरिमा शाह पराजित हुँदा बिना मात्रै चुनावमा भारी मतको अन्तरका साथ विजयी भएकी हुन्।
उनले ३८ हजार ४६८ मत ल्याएकी हुन् भने प्रतिस्पर्धी कांग्रेसका दिवानसिंह विष्टले १९ हजार २१९ मत ल्याए। यो १९ हजार २४९ मतको फरक हो।
७ नम्बर प्रदेशबाट प्रदेशसभा सदस्यमा भने बझाङ १ को प्रदेश ‘ख’ बाट वाम गठबन्धनकी उम्मेदवार माओवादी केन्द्रकी देवकी मल्ल (थापा) विजयी भए पनि प्रतिनिधिसभामा बिना नै एक्ली महिला बनिन्।
विजयी भएपछि प्रतिक्रया दिँदै बिनाले निरन्तर जनसम्पर्क स्थापित गर्न तथा गुनासो र समस्याको समाधानका लागि स्थानीय तहमा सहायता कक्ष (हेल्प डेस्क) स्थापना गर्ने घोषणा गरेकी छन्।
'निर्वाचन प्रचारका क्रममा सार्वजनिक गरेको प्रतिबद्धतापत्रलाई मुख्य मार्गचित्र मानेर क्षेत्रको विकासमा लाग्न वाम गठबन्धनका उम्मेदवार एकमत रहेका छौँ,' उनले भनिन्, 'यसमा सबैको साथ र सहयोगको आवश्यकता पर्छ।'
स्थानीय तह, प्रदेश र केन्द्र गरी तीन वटै तहबीच आवश्यक समन्वय गरेर विकासको सपनालाई मूर्तरुप दिनुपर्नेमा आफू दृढ रहेको बताउँदै उनले संसद् र सिंहदरबारमा सक्रिय भूमिका निर्वाह गरेर आफ्नो क्षेत्रमा बढीभन्दा बढी बजेट र योजना ल्याउने र समयसीमाभित्रै प्रभावकारी कार्यान्वयन गराउने प्रतिबद्धता जनाइन्।
बिना २०४० मंसिर २२ गते पुनर्वास नगरपालिकामा जन्मिएकी हुन्। पुनर्वासको अरनिको बस्तीको अरनिको प्राविबाट शिक्षा सुरु गरेकी उनले गौरीशंकर निम्न मावि र जनता मावि पुनर्वासबाट माध्यमिक तहसम्मको शिक्षा हासिल गरिन्।
राज्यको विभेदकारी नीतिलाई फेर्ने उद्देश्य लिएर उनी तत्कालीन उनी नेकपा (माओवादी) ले सुरु गरेको सशस्त्र आन्दोलनमा सुरुदेखि नै सक्रिय रुपमा लागिन्।
सुरुवाती चरणमा उनी सांगठनिक र सांस्कृतिक कार्यक्रममा निकै सक्रिय बनिन्। २०५६ मा बिनाले महिलाको हकअधिकार प्राप्तिका साथै सांगठनिक र वैचारिक अवस्था विकास गराउन अखिल नेपाल महिला संघ (क्रान्तिकारी) कञ्चनपुरको अध्यक्षको समेत भूमिका निर्वाह गरिन्।
राजनीतिक यात्रासँगै उच्च शिक्षा अध्ययनका लागि उनी यसपछि काठमाडौँ प्रस्थान गरिन्। काठमाडौँमा उनलाई राजधानीको वातावरण, रहनसहन, समाज र राजनीतिक शासन व्यवस्थाबारे नजिकबाट अध्ययन गर्ने अवसर मिल्यो। काठमाडौँ र जन्मभूमि पुनर्वास लगायत आसपासका क्षेत्रको विकासको अवस्था तुलना गर्दा राज्यले गरेको विभेद उनले प्रत्यक्ष देख्न पाइन्।
गाउँगाउँमा विकास पुर्याउन र एकात्मक शासन सत्ताको अन्त्यका लागि संघर्ष नै मुख्य बाटो देखेर मगरले सशस्त्र संघर्षको यात्रालाई अगाडि बढाइरहिन्। काठमाडौँमा पनि तत्कालीन अखिल क्रान्तिकारीको विद्यार्थी संगठनमा आबद्ध भएर भित्री रूपमा नेकपा (माओवादी) पार्टीको पूर्णकालीन सदस्यको रूपमा उनी सक्रिय भइन्।
विद्यार्थीका थुप्रै हकअधिकार र जनजीविकाका लागि संघर्ष गरिरहँदा उनलाई २०६० मा अखिल (क्रान्तिकारी) काठमाडौँ जिल्ला अध्यक्षको जिम्मेवारी प्राप्त भयो।
राज्यको धरपकड र दमनबीच २०६० मा उनी तत्कालीन शाही नेपाली सेनाको गिरफ्तारीमा परेकी थिइन्। 'मानव वधशाला' भनेर चिनिएको सेनाको भैरवनाथ गणमा २७ महिना उनलाई बेपत्ता बनाइएको थियो। 'हिरासतमा रहँदा करेन्ट लगाउने, पानीमा डुबाउने, पाइपले पिट्ने लगायतका अमानवीय यातना दिइने गरिन्थ्यो,' उनले भनिन्।
२०६२/६३ को जनआन्दोलन उत्कर्षमा थियो। त्यति नै बेला परिवारको तर्फबाट रिहाइको माग गर्दै बन्दी प्रत्यक्षीकरणको रिट सर्वोच्च अदालतमा दर्ता गरिएपछि अदालतले गैरन्यायिक हिरासतबाट बिनलाई रिहा गर्न आदेश दिएको थियो।
२०७० को दोस्रो संविधानसभा निर्वाचन क्षेत्र नं १ बाट प्रत्यक्ष उम्मेदवार भएकी उनी झिनो मतान्तरले पराजित भएकी थिइन्। संविधानसभाको निर्वाचनमा झिनो मतको अन्तरले पराजित हुँदाको बदला बिनाले यस निर्वाचनमा विजयी भएर लिएकी छन्।
प्रतिनिधिसभाको उम्मेदवार भई प्रचारप्रसारमा संलग्न रहेकै बेला श्रीमान् प्रकाश दाहालको असामयिक निधन भएपछि पनि उनले हिम्मत हारिनन्। शोकलाई शक्तिमा बदल्दै जनताका समस्या समाधानका लागि निरन्तर लाग्दा नै अहिले विजय प्राप्त भएकोमा उनी गर्व गर्छिन्।
यसरी प्रतिनिधिसभामा प्रतिनिधित्व गर्ने उनी प्रदेश नं ७ की एक्ली विजयी महिला उम्मेदवार बन्न पुगेकी छिन्।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
