काठमाडौं- नेत्रविक्रम चन्द 'विप्लव' नेतृत्वको नेपाल कम्युनिष्ट पार्टीबाट निलम्बनमा परेका पदम राई सत्तारुढ नेपाल कम्युनिस्ट पार्टीमा प्रवेश गर्ने भएका छन्।
आइतबार बिहान १० बजे नेकपा केन्द्रीय कार्यालय धुम्बाराहीमा राईलाई अध्यक्षद्वय केपी शर्मा ओली र पुष्पकमल दाहाल 'प्रचण्ड'ले पार्टीमा भित्र्याउन लागेका हुन्।
राईलाई पार्टी नीति विपरीत अभिव्यक्ति दिएको भन्दै गत महिना पार्टीको पोलिटब्युरो सदस्यबाट निलम्बन गरिएको थियो। राईले सरकारसँग वार्ताको वातावरण बन्दै गएको अभिव्यक्ति दिएका थिए। पार्टीले भूगोलमा कुनै जिम्मेवारी नदिएका राईलाई बैसाख २४ मा निलम्बन गरिएको थियो।
भोजपुर निवासी राई पूर्व राज्यमन्त्री समेत हुन्। उनी शान्ति प्रक्रियापछि आवास तथा भौतिक योजना राज्यमन्त्री पनि भएका थिए।
२०६४ को संविधानसभा निर्वाचनमा भोजपुर '१' बाट सभासद बनेका थिए। राई तत्कालिन नेकपा माओवादीनिकट किराँत राष्ट्रिय मुक्तिमोर्चाका केन्द्रीय अध्यक्ष पनि भएका थिए।
गत निर्वाचनमा प्रदेश १ का मुख्यमन्त्री शेरधन राईलाई चुनावी प्रचारका क्रममा आक्रमण गरेको आरोपमा उनी पक्राउ परेका थिए।
मोरङमा पक्राउ परेका उनी ६० हजार धरौटीमा रिहा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
