काठमाडौं- प्रधानमन्त्री केपी शर्मा ओली मापदण्ड मिचेर पोखराको लेकसाइडमा बनाइएको एक होटलको उद्घाटन गर्न शनिबार पोखरा जान लागेका छन्।
प्रधानमन्त्री ओलीले मापदण्डविपरीत निर्माण गरिएको स्विस इन्टरनेसनल होटल सरोवरको आज उद्घाटन गर्ने कार्यक्रम तय भएको छ।
पोखरा महानगरमा ३५ मिटरभन्दा अग्लो भवन बनाउन नपाइने पुरानो मापदण्ड थियो। वर्तमान प्रावधानमा भने यसलाई घटाएर १७ मिटर अग्लो मात्रै बनाउन पाइने मापदण्ड तोकिएको पोखरा महानगरपालिकाका मेयर मानबहादुर जिसिले बताए। प्रधानमन्त्रीले उद्घाटन गर्ने स्विस इन्टरनेसनल होटल सरोवर भने १२ तलाको बनाइएको छ।
'स्थानीय सरकार सञ्चालन ऐन' आउनुभन्दा अघि बनेका संरचनालाई भवन आचार संहिताको मापदण्डअनुसार भएको भए अद्यावधिक गर्ने महानगरपालिकाले सूचना जारी गरेको थियो। जिसीले भने, ‘साढे तीन तलाको स्विकृति लिएर १२ तला बनाइएको छ। उक्त होटलले सम्पन्नताको प्रमाणपत्र लिएको छैन।’
को हुन् होटल सञ्चालक पहारी?
लेकसाइडस्थित मीरा गल्लीमा बनाइएको उक्त १२ तले होटलका सञ्चालक हुन् भरत पहारी। उनी महानगरको मापदण्ड निर्धारण सिफारिस समितिको संयोजक समेत रहेर काम गरेका व्यक्ति हुन्।
गत मंसिरमा पहारीविरुद्ध भ्रष्टाचारको मुद्दामा फैसला हुँदा उनी दोषी ठहरिएका थिए। ९८ लाख ९३ हजार रुपैयाँ बराबरको सम्पतिको स्रोत नखुलेको भन्दै विशेष अदालतले उनलाई कैद तथा जरिवानाको फैसला सुनाएको थियो।
अख्तियारले पहारीले अकुत सम्पति कमाएको भन्दै २०७३ साउन २४ मा ४ करोड रुपैयाँ भन्दा धेरैको विगो दाबी गर्दै विशेष अदालतमा मुद्दा दायर गरेको थियो।
अख्तियारले उनकी श्रीमतीविरुद्ध पनि अकुत सम्पति कमाएको भन्दै मुद्दा दर्ता गरेको छ। उनी पोखरा महानगरका विज्ञ डाक्टरका रुपमा समेत कार्यरत थिए। पहारीले पुल्चोक इन्जिनियर कलेजमा प्राध्यापनसमेत गर्दै आएका थिए।
फागुनमा मृत्यु भएका तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीका नाममा बनेको स्मृति प्रतिष्ठान, स्काउटको कार्यक्रम र होटलको उद्घाटन गर्न प्रधानमन्त्री पोखरा जान लागेका उनका प्रेस संयोजक चेतन अधिकारीले जानकारी गराए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
