काठमाडौं- नेकपा एमालेले वर्तमान कामचलाउ सरकारले गरेका राजनीतिक नियुक्ति नयाँ सरकारले बदर गर्ने जनाएको छ।
निर्वाचन सम्पन्न भएलगत्तै कामचलाउ हैसियतमा पुगेको वर्तमान सरकारले विभिन्न निकायमा गरेको राजनीतिक नियुक्तिप्रति आफ्नो गम्भीर ध्यानकर्षण भएको जनाउँदै एमालेले नयाँ सरकारले त्यस प्रकारका निर्णयलाई निरन्तरता नदिने स्पष्ट पारेको छ।
एमालेका महासचिव ईश्वर पोखरेलले जारी गरेको विज्ञप्तिमा भनिएको छ- 'नेपाली जनताले वाम गठबन्धनलाई दुई तिहाई बहुमतको समर्थन प्रदान गरी निर्वाचित गरेको आजको सन्दर्भमा यस्ता जुनसुकै निर्णयको निरन्तरता नयाँ सरकारले किमार्थ नदिने समेत सबैमा स्पष्ट पार्दछौं।'
राजनीतिक नियुक्ति गरी मौका छोप्न खोज्नु वर्तमान सरकारको दुराशय र जनादेशविपरीत कदम भएको एमालेको टिप्पणी छ।
प्रदेश प्रमुख र त्यससँग सम्बन्धित विभिन्न निर्णय गर्न लागेको सूचनाप्रति आफ्नो गम्भीर ध्यानाकर्षण भएको बताउँदै एमालेले वर्तमान सरकारले गरेका राजनीतिक नियुक्ति जनादेशविपरीत रहेको ठहर गरेको छ।
मन्त्रिपरिषदको आजको बैठकले चलचित्र विकास बोर्ड, गोरखापत्र संस्थान लगायत निकायमा नियुक्ति गरेको थियो।
एमालेले वर्तमान सरकारको गलत निर्णयमा संलग्न नहुन निजामती कर्मचारीलाई सचेत समेत गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
