काठमाडौं– नेपाली राष्ट्रिय फुटबल टिमका नम्बर एक गोलकिपर किरण चेमजोङ र माल्दिभ्सको पहिलो डिभिजनको क्लब टिसी स्पोर्टसबीच भएको सम्झौता रद्द भएको छ।
टिसी स्पोर्ट्सले राष्ट्रिय टिमको खेल छाडेर माल्दिभ्स आउन आग्रह गरेको थियो। तर किरणले आगामी साता हुन लागेको २ मैत्रीपूर्ण खेल कारण माल्दिभ्स आउन नसक्ने क्लबलाई जनाकारी दिएका थिए। एन्फाले पनि क्लबलाई पत्रचार गरेको थियो। तर क्लबले भने सम्झौता नै रद्द गरेको छ।
किरण र टिसी स्पोर्टसबीच लिखित सम्झौता भए पनि सम्झौता हस्तान्तरण भएको थिएन। सम्झौता रद्दबारे कुरा गर्दै किरणले राष्ट्रिय टिम र क्लब दुवैले रिलिज नगरेकाले रद्द भएको बताए। उनले भने,'एन्फाले रिलिज गर्न मानेन। उता क्लबले पनि राष्ट्रिय टिमका लागि छोडेन।'
उनले आफ्नो प्राथमिकता राष्ट्रिय टिम भएकाले मैत्रीपूर्ण खेलमा राम्रो खेल्ने प्रतिक्रिया दिए। त्यसपछि नयाँ सम्झौताबारे सोच्ने उनको भनाइ छ।
नेपालले जेठ १९ गते आइतबार मलेसियासँग मैत्रीपूर्ण खेल्ने कार्यक्रम छ। नेपालले दोस्रो मैत्रीपूर्ण खेल २३ जेठमा चाइनिज ताइपेईसँग खेल्ने कार्यक्रम छ। मैत्रीपूर्ण खेलका लागि किरणसहितको नेपाली टिम बिहीबार मलेसिया प्रस्थान गर्दैछ।
गत महिना आगामी जुनदेखि सुरु हुने पहिलो डिभिजनको लिग धिवेदी प्रिमियर लिगका लागि टिसी स्पोर्ट्स क्लबले फरवार्ड विमल घर्तीमगर र गोलकिपर किरण चेमजोङसँग सम्झौता गरेको गरेको थियो। टिसी स्पोर्ट्स लिगको साविक विजेता हो। राष्ट्रिय टिममा नरहेका विमल केहि दिनमा माल्दिभ्स जानेछन्।
यसअघि उनले बेल्जियम गएर त्यहाँको स्थानिय क्लबमा ट्रायल दिए पनि सफल भएका थिएनन्। गत सिजनको ए डिभिजन लिग च्यासल क्लबबाट खेलेका विमल त्यसअघि थ्रीस्टारमा आबद्ध थिए। उनले गत वर्ष भारतीय आइलिग क्लब मोहन बगानका लागि अन्तिम सत्रमा सम्झौता गरेका थिए। तर उनले सोचे जस्तो प्रदर्शन गर्न सकेनन्।
२०१७ मा टिसीबाट पहिलो सिजन खेलेका किरणले प्रेरणादायी खेल पस्केका थिए। त्यतिबेला टिसी स्पोट्सले माल्दिभ्सको माथिल्लो डिभिजनमा दोस्रो स्थान हात पारेको थियो।
गत सिजत किरण भारतको पहिलो डिभिजनको लिग आई–लिगमा मिनेर्भा पञ्जाव एफसीबाट केहि महिना खेलेका थिए। पछि फेरि उनी टिसी स्पोर्ट्समै आबद्ध भएका थिए।
किरण गत सिजन माल्दिभ्सको पहिलो डिभिजनको लिग धिवेदी प्रिमियर लिग २०१८ को उत्कृष्ट गोलकिपर बनेका थिए। किरणले सिजनमा टिसी स्पोर्टसलाई उपाधि जिताउन उत्कृष्ट प्रदर्शन गरेका थिए। चेमोजङले दोस्रो विदेशी लिगको उपाधि उचाल्ने अवसर पाएका थिए। यसअघि उनले गत वर्ष भारतको मिर्नेभा पन्जाव एफसीबाट खेल्दै आई लिगको उपाधि जितेका थिए।
२८ वर्षीया किरणले सन् २०१६ मा मनाङ मस्याङ्दीबाट खेलेका खेलेका थिए। एन्फा एकेडेमीका उत्पादन किरणले २००९ देखि २०१६ सम्म थ्री स्टार क्लबबाट खेले। त्यसक्रममा उनले थ्री स्टारलाई लिगसहित दर्जनौ घरेलु फुटबल प्रतियोगिताको उपाधि जिताउन उत्कृष्ट प्रदर्शन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
