इनरुवा- बदर मतलाई पनि गणना गरेको भन्दै सुनसरी क्षेत्र नम्बर ३ प्रतिनिधिसभाकी एमाले उम्मेदवार भगवती चौधरीले प्रमुख निर्वाचन अधिकृतसमक्ष उजुरी दिएकी छन्।
नेपाली कांग्रेसका उम्मेदवार विजयकुमार गच्छदारलाई जिताउन औंठाछाप लागेको रुख चिह्नको मत समेत सदर गर्दै गणना भएको भन्दै चौधरीले उजुरी दिएकी हुन्। विवादपछि सुनसरी ३ को मतगणना हाल स्थगित छ।
सुनसरी निर्वाचन क्षेत्र नम्बर ३ को २९६, ३२१, ३४६, ३७१ र ३९६ नम्बरका मतपेटिकामा अर्धकट्टीसमेत जोडिएका र औंठाछाप लागेका मतपत्र रहेकाले त्यसलाई बदर गर्नुपर्ने चौधरीले माग गरेकी छिन्। उम्मेदवार चौधरीका प्रतिनिधि विनोदकुमार चौधरीले उजुरीको सम्बोधन नभएसम्म मत गणना नगर्न माग गरेका छन्।
मतगणनाको सुरुदेखि नै अग्रतामा रहेकी एमाले उम्मेदवार चौधरीसँग गच्छदारले मतको अन्तर २ सयमा झारेपछि उक्त क्षेत्रमा विवाद भएको थियो। बिहान पाँच बजेसम्म ८ सयको मतान्तरमा रहेका उपप्रधान तथा स्थानीय विकासमन्त्री गच्छदार गणना स्थगित हुनुअगाडि २ सय ७१ मतले पछाडि छन्।
चौधरीले २७ हजार ७ सय १२ मत ल्याएकी छन् भने गच्छदारले २७ हजार ४ सय ४१ मत ल्याएका छन्। ६० हजार ६ सय ४४ मत गणना हुँदा गच्छदार झिनो मतले मात्र पछि परेका छन्।
भगवती चौधरीले दिएको उजुरी:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
