काठमाडौं- कामचलाउ सरकारले धमाधम राजनीतिक नियुक्ति गर्न थालेको छ।
सोमबार बिहानै बसेको मन्त्रिपरिषद् बैठकले गोराखापत्र संस्थानको महाप्रबन्धक र चलचित्र विकासको बोर्डको अध्यक्ष नियुक्त गरेको छ। तर नियुक्ति सम्बन्धी निर्णय सूचना तथा सञ्चारमन्त्री मोहनबहादुर बस्नेतले लुकाए। बैठकलगत्तै सम्बोधन गर्दै मन्त्री बस्नेतले दुई सहायक रथी र एक प्राविधिक उपरथीको पदावधि बढाएको मात्र जानकारी दिए। अन्य कुनै पनि निर्णय नभएको उनले बताएका थिए। ‘क्याबिनेटको बैठकमा आज खासै निर्णय भएन, यिनै सामान्य पदावधि थप्ने निर्णय भयो,’ उनले थपे, ‘मन्त्रालयका विदेश भ्रमणका प्रस्तावहरुलाई अनुमोदन गरिएको छ।’
सञ्चारमन्त्री बस्नेतले सहायक रथी दामोदर थापा र नवजित शमशेर राणा तथा प्राविधिक उपरथी योगेन्द्रबहादुर खाँडको पदावधि बढाउने निर्णय गरिएको बताए। बैठक स्रोतका अनुसार गोरखापत्र संस्थानको महाप्रबन्धकमा वसन्तप्रकाश उपाध्याय र चलचित्र विकास बोर्डको अध्यक्षमा निकिता पौडेललाई नियुक्त गरिएको छ।
कामचलाउ अवस्थामा रहेको सरकारले निर्वाचनको अन्तिम समयतिर धमाधम राजनीतिक नियुक्ति दिन थालेको छ। मन्त्रिपरिषदको अर्को बैठक चाँडै बस्ने सरकारका प्रवक्तासमेत रहेका सञ्चारमन्त्री बस्नेतले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
